Kur u duk se gjithçka po i kthehej normalitetit, kreu i PD-së, Lulzim Basha i është kthyer kërkesës për qeveri teknike, siç është shprehur ai, si një kusht i panegociushëm për ta lënë çadrën.
“Nuk ka tërheqje, nuk ka dorëzim, nuk ka pazar. Koha e pazarave politike në kurriz të qytetarëve ka marrë fund. Elita e korruptuar e republikës së vjetër duhet ta harrojë se ky shesh do të zbrazet pa arritur zgjedhje të lira dhe të ndershme. Qeveria teknike është kusht i patjetërsueshëm për të garantuar zgjedhje të lira dhe të ndershme dhe për t’i hapur rrugë zbatimit të reformës së vërtetë në drejtësi, sipas përcaktimeve kushtetuese”, ka shkruar Basha në FB gjatë orëve të mbrëmjes.
Ky qëndrim i tij vjen në kohën që në Tiranë ndodhet Frederika Mogherini, njeriu kryesor i Brukselit, mesazhet e së cilës shkojnë të gjitha për votimin e Vetingut, gjë e pamundur pa opozitën në parlament.
Më herët, si mazhoranca ashtu dhe opozita këmbyen mesazhe gadishmërie për dialog pa nxjerrë kushte. Rikthim i kërkesës për qeveri teknike nga ana e Bashës e kthen situatën në pikën zero. /tesheshi.com/
