Kryeministri maqedonas dhe lideri i LSDM-së, Zoran Zaev, ka thënë se do të mbetet në detyrë për të ndihmuar në ruajtjen e shumicës parlamentare dhe mundësisht rritjen e saj.
Zaev, i cili dha dorëheqje më 31 tetor pas zgjedhjeve lokale, pas seancës së Bordit Kryesor dhe Ekzekutiv të LSDM-së të martën mbrëma tha se komisioni kishte propozuar shtyrjen e dorëheqjes dhe se ishte i përkushtuar në procesin e ruajtjes së shumicës parlamentare.
“Nuk kam çfarë të shtoj tjetër, sepse kryetari i Bordit i ka shpallur vendimet dhe i është përgjigjur të gjitha pyetjeve. Është e rëndësishme që vendi të mos kthehet në të shkuarën e grindjeve brenda dhe jashtë vendit, për të rrezikuar procesin e integrimit europian, sigurisht që është e rëndësishme sepse jemi ende në një kohë pandemie, krize energjitike, përgjegjësi e çdo qytetari dhe e politikani”, tha Zaev.
Ai po ashtu tha se shpreson që shumica demokratike parlamentare të stabilizohet, para së gjithash, pasi sipas tij, është e orientuar drejt rrugës euroatlantike dhe shoqërisë multietnike, si dhe drejt ruajtjes së marrëdhënieve të mira fqinjësore dhe reformave pozitive.
“Ditët janë përpara nesh, do të shohim”, tha Zaev.
Nga ana tjetër, një shumice e re parlamentare e pretenduar, e dakorduar të premten nga partitë opozitare maqedonase VMRO DPMNE dhe e Majta me Aleanca për Shqiptarët dhe Alternativa-n, si dhe me ndihmën e përfaqësuesve të Lëvizjes Besa në pushtet, dorëzuan në Kuvend një mocion mosbesimi ndaj qeverisë. /tesheshi.com/
