Presidenti i Maqedonisë Veriore Stevo Pendarovski beson se integrimi i vendit të tij, si dhe i të gjitha vendeve të Ballkanit Perëndimor në Bashkimin Evropian, është “në interes të sigurisë dhe prosperitetit rajonal”.
Gjatë vizitës së tij zyrtare në Romë, ai tha se “Maqedonia Veriore nuk ka alternativë tjetër përveç integrimit në BE”.
Sipas tij, “modelet e tjera për ndërtimin e marrëdhënieve midis vendeve të Ballkanit Perëndimor dhe BE nuk janë të pranueshme”.
Kabineti i presidentit maqedonas tha se Pendarovski ishte informuar në Romë për pranimin e nismës së Italisë për të mbajtur një takim të jashtëzakonshëm të Këshillit të Çështjeve të Përgjithshme të BE-së, në të cilën duhet të rihapet çështja e fillimit të bisedimeve të pranimit me Maqedoninë Veriore dhe Shqipërinë.
Pendarovski u takua gjithashtu me homologun italian Sergio Mattarella.
ANSA raporton se Italia mbështet fuqimisht integrimin e të gjitha vendeve të Ballkanit në BE dhe kujton se Roma zyrtare ka kritikuar vonesën e fundit në fillimin e bisedimeve të pranimit midis Shkupit dhe Tiranës me Brukselin. /tesheshi.com/
