Pema Evropiane e vitit 2024 po rritet në Poloni, pasi fitoi zemrat e 40,000 votuesve në një konkurs që ka nisur që nga viti 2011. Ahu madhështor 200-vjeçar me gjethe të kuqe e ka fituar këtë titull prestigjioz, jo për shkak të madhësisë apo moshës së tij, por për shkak të historisë dhe simbolikës së tij unike.
Pema e ahut, e cila ka emrin latin Fagus sylvatica Atropunicea dhe emrin romantik “Zemra e Kopshtit”, shquhet për gjethet e saj të kuqe vjollcë, që është një dukuri e rrallë në natyrë. Historia e saj shkon pas dy shekujsh, pasi i mbijetoi dy luftërave botërore, ndërrimit të brezave si dhe situatave të shumta të vështira që prekën Silesinë e Poshtme dhe më gjerë.
Kjo pemë ahu nuk është vetëm simbol i Polonisë, por edhe i të gjithë komunitetit evropian. Konkursi “Europian Tree of the Year” synon të nxjerrë në pah pemët që tregojnë histori të pazakonta dhe frymëzuese dhe “Zemra e Kopshtit” është sigurisht një prej tyre, shkruan DW.
E mbjellë 200 vjet më parë, kjo pemë ahu nuk kishte gjethe jeshile si shumica e pemëve të tjera, por të kuqe vjollcë, gjë që ishte shumë e pazakontë në atë kohë. Pemë të tilla ndodheshin shpesh pranë kështjellav dhe pallateve, gjë që e shton më tej veçantinë e saj.
Fatkeqësisht, vitet e fundit, ahu ka filluar të shfaqë simptoma të sulmeve mykotike që po e hanë nga brenda. Simptomat u bënë të dukshme vetëm pak vite pasi kërpudhat filluan të sulmonin, por tashmë kjo pemë është nën kujdesin e veçantë të ekspertëve të pemëtarisë dhe fitopatologëve. Me këtë në mendje, ka shpresë që “Zemra e Kopshtit” të jetojë për një kohë të gjatë dhe të vazhdojë të tregojë historinë e saj. /tesheshi.com/
