Pekini ka zhvilluar një fushatë për të testuar një numër të madh të njerëzve për COVID-19, pasi pati një shpërthim i ri i infeksionit në qytet, e për këtë shkak frikësohet vala e dytë e epidemisë në Kinë, raporton AFP.
Falë kontrolleve të rrepta, karantinës e maskave, virusi koronar ishte zhdukur pothuajse nga toka kineze pasi u shfaq në Wuhan në fund të vitit 2019, dhe zbulimi i një hotspot të ri në një treg në kryeqytet i befasoi qytetarët e Pekinit.
Ministria kineze e Shëndetësisë njoftoi se 57 raste të reja infeksioni janë regjistruar në vend në 24 orët e fundit të dielën. Nga këto, 36 janë në Pekin.
Të gjithë janë të lidhur me tregun e madh Xinfadi, i cili kryesisht shet mish, peshk dhe perime, e është vendi kryesor për furnizimin me ushqime të freskëta në qytet.
Ky zbulim çoi në izolimin e 11 zonave të banimit. Megjithatë, është një pjesë e vogël e Pekinit, i cili ende jeton normalisht, larg çdo psikoze.
Zyra e kryetarit të bashkisë në Pekin ka njoftuar se dëshiron të testojë rreth 46,000 njerëz (nga 22 milion që jetojnë në kryeqytet) në 24 vendet e provave.
Të gjithë ata që punojnë ose kanë qenë së fundmi në tregun Xinfadi duhet të testohen. Deri më tani, 10,881 njerëz janë testuar, thonë autoritetet.
“Unë isha në treg kohët e fundit. Kështu që dua të sigurohem që nuk kam COVID-19”, tha një grua 32-vjeçare kineze për AFP, përpara stadiumit atletik, ku u organizua testimi.
“Nëse jeni pozitiv, shkoni në spital. Nëse jeni negativ, duhet të izoloheni për 14 ditë,” shpjegoi ajo.
Tregu i madh Xinfadi ka disa pjesë. Ato që shesin mish dhe peshk të dielën janë të mbyllura dhe ruhen nga policia dhe policia ushtarake.
Pjesa ku shiten perimet mbeti e hapur.
Media zyrtare raportoi se virusi është zbuluar në treg, në sipërfaqet e përdorura për prerjen e salmonit të importuar. /tesheshi.com/
