Parlamenti Evropian miratoi raportin e Vladimir Bilçikut, i cili është raportuesi i përhershëm i PE për Serbinë.
Raporti prek çështje që lidhen me përparimin e vendit në rrugën evropiane.
Bilçik bëri thirrje për forcimin e pavarësisë së gjyqësorit, luftën kundër krimit të organizuar dhe korrupsionit dhe forcimin e një mjedisi të pavarur mediatik. Ai po ashtu përshëndeti zbatimin e zgjedhjeve të fundit parlamentare, rikthimin e opozitës në Kuvend dhe përmirësimin e fundit të marrëdhënieve ndërmjet Kosovës dhe Serbisë.
Marrëdhëniet e papranueshme me Rusinë
“Ne të gjithë jemi të vetëdijshëm se Serbia dhe qeveria e re janë të përkushtuara për të punuar drejt anëtarësimit në BE, që është zgjedhja strategjike e Serbisë dhe presim që ajo të mbetet e tillë. Ne presim vazhdimin e reformave të brendshme, para së gjithash në fushën e drejtësisë, Serbia duhet të punojë në përmirësimin e proceseve demokratike dhe mbi të gjitha duhet të shohim përparim në lirinë e medias – sulmet ndaj gazetarëve janë të papranueshme”, tha Bilçik në konferencën për shtyp.
Ai përkujtoi se Serbia është ende i vetmi vend kandidat për në Bashkimin Evropian në Ballkanin Perëndimor që nuk ka mbështetur sanksionet kundër Rusisë dhe ndikimi i së cilës në atë vend është ende i madh.
Mesazhi kryesor i raportit, siç tha ai, është se Bashkimi Evropian e dëshiron Serbinë në krah, prandaj marrëdhëniet me Rusinë janë të papranueshme, pra se Serbia është e vetmja në rajon që nuk është harmonizuar me Bashkimin Evropian për këtë çështje. /tesheshi.com/
