PDSH-ja e Menduh Thaçit në Maqedoni, një parti historike e katandisur me dy deputetë në Kuvend, ka shënuar sot aktin e parë të nënshtrimit ndaj BDI-së, duke u shndërruar në një “ushtar” politik të saj.
Në mungesë të kuorumit për përzgjedhjen e drejtorit të Agjencionit për Administratë, ishte pikërisht Bardhyl Dauti, deputeti i PDSH-së ai i cili kreu një shërbim koalicionit LSDM-BDI-Aleanca.
“Vota e përmbajtur”, ose më saktë “e munguar” e tij, mundësoi përzgjedhjen e drejtorit në fjalë, meqë paraprakisht kreu i Kuvendit, Talat Xhaferi njoftoi se nuk është përmbushur kuorumi prej 62 deputetësh, pasi që në ato moment salla e Kuvendit numëronte vetëm 61 deputetë prezentë, pa prezencën e Dautit.
Ky veprim i tij në mbështetje të koalicionit LSDM-BDI dhe Aleancës për Shqiptarët, vjen menjëhërë pas takimit të para një jave që realizoi lideri i LSDM-së, Zoran Zaev me atë të PDSH-së, Menduh Thaçin. Ashtu siç po zhvillohen rrjedhat politike në Maqedoni, me intensitet të njëjtë po dalin në sipërfaqe lojërat e dyshimta politike të BDI-së dhe PDSH-së. Tani, e pafuqishme për nga numri i deputetëve në Kuvend, PDSH e ka ulur aq shumë pazarin e saj, sa i shërben BDI-së dhe për kuorum. Cili është shpërblimi i koalicionit qeveritar për politikën prej “shërbëtereje të bindur” të PDSH-së, mbetet një enigmë të cilën do ta zbulojë koha. /tesheshi.com/
