Pas një periudhe të gjatë paralajmërimesh nga ana e kryeministrit të Maqedonisë, Zoran Zaev për zgjerim të formacionit qeveritar, duket se kjo marrëveshje e tij me partnerët e ardhshëm po merr fund.
Pjesë e qeverisë me shumë gjasë do të jenë Lëvizja BESA në krye me Afrim Gashin dhe Partia Demokratike Shqiptare e kryesuar nga Mendu Thaçi.
Këta dy të fundit realizuan një takim të përbashkët me kryeministrin Zaev, me ç‘rast njoftuan se kanë marrë një ofertë konkrete dhe korrekte për përfshirje në koalicionin qeveritar.
Thaçi beson se oferta do të miratohet në kuvendin e partisë, i cili është duke u mbajtur aktualisht në Tetovë, duke e bërë të ditur atë.
“PDSH-së i është ofruar posti i minstrit të Investimeve të Huaja, një post i zëvendësministrit të Transportit dhe Lidhjeve si dhe pozicione në eshalonin e tretë, për të cilat janë formuar komisione partiake”, ka thënë Thaçi.
Nga ana tjetër, kreu i Lëvizjes BESA, Afrim Gashi ende nuk e ka bërë publike ofertën.
Mirëpo në opinion flitet se BESËS do i takojnë Ministria e Kulturës, me shumë gjasë edhe Ministria e Arsimit dhe Shkencës.
Përveç ministrive këto dy parti do të marrin edhe nga disa drejtori.
Zgjerimi i qeverisë është propozim i kryeministrit Zoran Zaev në mënyrë që të sigurohet shumicë stabile. Ndërsa sipas Thaçit dhe Gashit, futja e tyre në qeveri dëshmon qasjen pro-anëtarësimit në BE dhe NATO.
Tani qeveria e Maqedonisë do të përbëhet prej 66 deputetëve. /tesheshi.com/
