PDK, dega Prishtinë, ka depozituar sot në Prokurorinë Speciale edhe një kallëzim të ri kundër Kryetarit të Prishtinës, Shpend Ahmeti, ish-drejtorit të Urbanizmit, Liburn Aliu, ish-drejtorit të Inspektoratit, Salih Zyba, Drejtorit të Financave, Ismail Kokaj, si dhe ish-sekretarit të Lëvizjes Vetëvendosje, Dardan Molliqaj.
Sekretari i PDK-së së Prishtinës, Bujar Cakolli, ka thënë se ka dyshime të bazuara se personat e përfshirë në padi, kanë kryer veprat penale “krim i organizuar”.
Sipas këtij kallëzimi penal, Dega e PDK-së në Prishtinë, ngreh dyshime të bazuara se këta persona kanë kryer veprat penale “krim i organizuar”, ku me dashje direkte dhe me vetëdije, me qëllim të ushtrimit të veprimtarisë së kundërligjshme të grupit të organizuar u kanë mohuar qytetarëve të drejtat e lejes së ndërtimit në kundërshtim me nenin 21 të Ligjin nr.04/L-110 për Ndërtim.
Në kallëzimin e saj penal, Dega e PDK-së së Prishtinës ka marrë edhe shembuj konkret, ku në lagjen “Lakërishte” pas Pallatit të Rinisë dhe Sporteve është mohuar një leje ndërtimi për objekt, ndërsa në vijë të drejtë të ndërtimit është lëshuar leja për një objekt tjetër.
Rasti i njëjtë, sipas PDK-së së Prishtinës, është edhe në lagjen “Arbëria”, afër objektit të ri të komunës, ku edhe pse qytetarët i posedojnë lejet urbanistike prej vitit 2006, penalizohen duke mos iu lëshuar ajo ndërtimore.
Gjithashtu, në kundërshtim me nenin 21 të Ligjit nr.04/L-110 për Ndërtim dhe në kundërshtim me Planin Rregullues, Komuna e Prishtinës ka lëshuar leje ndërtimi në hapësirë gjelbëruese në lagjen “Bregu i Diellit”, konkretisht në Rrugën B.
Personat e dyshuar, sipas PDK-së, në bazë të preferencave partiake u kanë lëshuar leje ndërtimore militantëve partiakë dhe grupeve të interesit të afërta me zyrtarët e Vetëvendosjes, ku pastaj në diskutim dhe marrëveshje me të dyshuarit e tjerë u kanë mohuar lejet e ndërtimit qytetarëve të Prishtinës në kushte të barabarta. /tesheshi.com/
