Nga Blendi Gashi
Një ditë pasi i vëllai Shukriu u largua nga PDK-ja, një vendim të tillë e ka ndërmarrë edhe Ramë Buja, por ky i fundit nuk ka treguar nëse do i bashkohet ndonjë partie.
Ish-ministri i Arsimit në mbledhjen e kryesisë së Partisë Demokratike të Kosovës, e cila u mbajt sot ka dorëzuar letër dorëheqjen, duke thënë se largohet nga partia me dhimbje të madhe dhe të pamatshme, por e merr një vendim të tillë pasi partia ka degraduar aq shumë sa ai nuk e gjen vetën në një mes të tillë, pa thënë një fjalë të vetme për kreun Kadri Veseli.
“Jap dorëheqje të pakthyeshme nga Kryesia e Partisë Demokratike të Kosovës me keqardhje të madhe dhe dhimbje të pamatshme! Arsyet janë objektive dhe të shumta e të shumëkohëshe, që nuk dua ti përmend në këtë rast, por vetëm ju bëj të ditur se, këtu pushon angazhimi im në kreun e kësaj partie, ku isha njëri nga themeluesit e saj dhe në të cilën investova mundin dhe përpjekjet e vazhdueshëm, pothuaj dydekadëshe, ndërsa tani nuk më mbeti më as vend e hapësirë për veprim e kontribut.
Degradimi që po ndodh (qofsha i gabuar) do ta trazojë e ç’orjentojë akoma më shumë këtë subjekt politik, nëse nuk i vihet digë penguese të keqes dhe degjenerimit politik në vazhdim, gjë në të cilën unë kam humbur përfundimisht”, thuhet në letër dorëheqjen e Bujës.
Pozitat në UÇK…
Pavarësisht arsyeve pse ja ktheu shpinën PDK-së pas 17 vitesh angazhimi në të, duhet kujtuar se Ramë Buja si një prej themeluesve të këtij subjekti ka qenë kyç jo vetëm në parti por edhe në UÇK, pasi i janë besuar pozita të rëndësishme nga Hashim Thaçi.
Nga nëntori i 1998 deri prill 1999 ka mbajtur pozitën e anëtarit të Shtabit të Përgjithshëm të UÇK-së dhe anëtarit të Drejtorisë Politike të SHP të UÇK-së.
Kurse nga qershori 1998 – prill 1999 po ashtu ka qenë kryeshef i Drejtorisë për Marrëdhënie Publike dhe Administrim Civil në SHP të UÇK-së.
Ndërsa në muajt shkurt e mars 1999 ka qenë anëtar i Delegacionit të Kosovës në Konferencën e Rambujesë.
Pozitat në qeverisjen e Thaçit…
Që në qeverinë e përkohshme (prill 1999 – shkurt 2000 ) i është besuar pozita e ministrit të Pushtetit Lokal.
Më pas ka ushtruar detyrën e bashkëdrejtuesit të Departamentit të Pushtetit Lokal (shkurt 2000 – korrik 2000).
Nga marsi 2003 deri më tetor 2004 ka mbajtur pozitën e këshilltarit politik në Ministrinë e Shërbimeve Publike dhe në nëntor të të njëjtit vit, në legjislaturën e dytë, është zgjedhur deputet.
Ka vijuar të jetë deputet edhe në vitet 2007 – 2010, ku i është besuar posti i kryetarit të grupit parlamentar të PDK-së.
Nga viti 2011 deri më 2014 në qeverinë “Thaçi 2” i është besuar pozita e ministrit të Arsimit, ku pas përfundimit të mandatit u akuzua për shpërdorim detyre.
Ndërsa në zgjedhjet e 11 qershorit, Kadri Veseli nuk e bëri pjesë të listës së PDK-së për deptuet, çka edhe mund ta ketë shtyrë Ramën të braktis partinë e tij.
Ramë Buja është doktor i Shkencave Politike, magjistër i Shkencave Juridike dhe njëherit ekonomist i diplomuar .
Ai është botues edhe i dy librave: “Konferenca e Rambujesë” (Aspekti politik, juridik dhe ndërkombëtar), (Studim, temë e magjistraturës), shtator, 2006 dhe “Çështja e Kosovës dhe shkatërrimi i Jugosllavisë” (Studim, tezë doktorate), janar 2007, si dhe artikuj të shumtë analitikë në shtypin dhe periodikun e kohës (nga 1992 e këtej). /tesheshi.com/
