Nga Blendi Gashi
Partitë politike parlamentare në Kosovë, në pjesë e dytë të muajit janar kanë shtuar ndjeshëm aktivitetet e tyre në disa nga degët në qytetet e Kosovës.
Në këtë drejtim, shumë aktive janë duke u treguar dy partitë në koalicion PDK e LDK.
Mbajtja e protestave të vazhdueshme nga partitë opozitare VV, AAK, NISMA, si dhe takimi i tyre me strukturat partiake, ka zgjuar nga gjumi partitë në pushtet, të cilat janë nisur në ofensivë të plotë për të mobilizuar përkrahësit e tyre në mbarë vendin, për zgjedhjet e reja të cilat, sipas të gjitha gjasave, pritet të mbahen gjatë këtij viti.
Por, drejtues të PDK-së dhe LDK-së kanë mohuar kategorikisht se takimet e tilla po mbahen për t’u përgatitur për zgjedhje, ndërsa i kanë quajtur aktivitete të zakonshme të partisë dhe komunikim më strukturat dhe anëtarësinë e saj.
Përkundër deklarimeve të partive në koalicion, njohësit e rrethanave politike në vend thonë se aktivitetet e tilla janë sinjale të qarta për përgatitje të elektoratit për zgjedhje të reja.
Analisti politik, Florim Zeqa, shprehet se si pasojë e protestave të vazhdueshme të opozitës edhe dy partitë e koalicionit qeverisës PDK-LDK, nga frika e humbjes së pushtetit iu janë kthyer elektoratit të tyre, duke parë si zgjidhje të vetme mbajtjen e zgjedhjeve të jashtëzakonshme.
“Mosinsistimi i mëtutjeshëm i partive në pushtet për mbajtjen e seancave të kuvendit në kushte dhe rrethana të jashtëzakonshme, është tregues i mjaftueshëm se vendi ndodhet shumë afër zgjedhjeve të jashtëzakonshme parlamentare.
Kështu për herë të parë, në historikun e zgjedhjeve të pasluftës, elektorati do të përballet jo me shumë parti si deri më tani, por vetëm me dy koalicione të fuqishme parazgjedhore, nga të cilat pritet të dalë një mazhorancë e fuqishme parlamentare dhe një opozitë konstruktive (nga pushtetarët aktual)”, thotë Zeqa për tesheshi.com.
Analisti politik, Kushtrim Gashi thotë se shtimi i aktiviteteve nga partitë e koalicionit qeverisës nëpër degë në qytetet të ndryshme të Kosovës, është sinjal dhe dëshmi e qartë që vendi po shkon drejt zgjedhjeve të parakohshme.
Ai tha se koalicioni i tanishëm qeverisës e ka pasur të garantuar mandatin dy vjeçar, por jo edhe atë katër vjeçar dhe atë për shkak të postit të presidentit.
“Në rast se nuk arrihet që të zbatohet marrëveshja politike dhe Hashim Thaçi të bëhet president, atëherë ky koalicion do të marrë fund së shpejti dhe vendi do të shkojë në zgjedhje të parakohshme, gjë që është skenari më i mundshëm të ndodhë.
Duke marrë parasysh që një pjesë e deputetëve të LDK-së kanë deklaruar se nuk do ta votojnë Hashim Thaçin për president, atëherë nëse vërtetë ata nuk e votojnë, zgjedhjet e parakohshme do të jenë të pashmangshme. Përndryshe partneri qeverisës LDK-ja e ka për obligim që t’i përmbahej marrëveshjes së arritur politike dhe të votonte Hashim Thaçin për president të vendit e në ketë mënyrë të shpëton Kosovën nga zgjedhjet e parakohshme”, thotë Gashi.
Njohësi i rrethanave politike në vend, Avdullah Bytyqi, thotë se partitë që janë në pushtet e ndjejnë rrezikun e humbjes së elektoratit, për shkak të nënshkrimit të marrëveshjeve antikushtetuese, ndaj edhe janë mobilizuar në terren.
Bytyqi në një prononcim për tesheshi.com thotë se partitë në pushtet, duke parë partitë opozitare që po shfrytëzojnë protestat për të rritur elektoratin, edhe PDK e
LDK kanë nisur ofensivën e po takojnë përkrahësit e tyre, të cilëve u japin mesazhin e qartë se nëse trokasin zgjedhjet, duhet të jenë të mobilizuar.
“Ato (PDK – LDK) nuk duan të jenë të papërgatitura përpara elektoratit, pasi e dinë se koha e zgjedhjeve po vjen, pasi nuk ka alternativë tjetër. Duke e parë edhe ambientin politik në Ballkan, ku tashmë dy shtete fqinje kanë shpallur zgjedhjet e parakohshme, edhe republika e Kosovës do të përfshihet në zgjedhje të parakohshme, madje edhe për arsye më të mëdha se këto dy shtete fqinje”, thotë Bytyqi./tesheshi.com/
