Liderët kosovarë, edhe pse se u ulën disa herë në një tryezë, ata nuk arritën të gjejnë zgjidhje për çështjen e shumëpërfolur, pra ndarjen e kufirit me Malin e Zi.
Ndonëse takimet e organizuara nga Naim Rashiti dhanë një shenjë, se po shihet një dritë në fund të tunelit, sërish rezultoi e pasuksesshme, pasi në fund, krerët e partive dështuan të gjejnë një zgjidhje për Demarkacionin, që do të ishte e pranueshme për të gjitha palët.
Pas Rashitit, në tryezë liderishipin kosovar e uli edhe komisioneri Johanes Hahn, por që edhe ky takim rezultoi pa sukses.
Duke parë mungesën e gadishmërisë për një zgjidhje, Hahn sipas raportimit të mediave kosovare tha se kështu nuk mund të ecet përpara për proçese të rëndësishme si Demarkacioni me Malin e Zi që ndërlidhet me liberalizimin e vizave ose Asociacionin e Komunave me shumicë serbe. Kështu, Sipas tij, zgjedhjet janë e vetmja zgjidhje.
Që vendi duhet të shkojë në zgjedhje të reja janë deklaratat e përfaqësuesve të politikës çdo ditë.
Sipas tyre, shkak për këtë është largimi i koalicionit qeverisës PDK-LDK, pasi nuk po arrijnë të çojnë përpara shumë proçese në vend dhe një nga dështimet e mëdha është liberalizimi i vizave.
Edhe deputetë të caktuar të PDK-së, Kadri Veselit ditët e fundit është shprehur se e ashtuqajtura “martesa e zorit” duhet të përfundojë sepse ka shumë pakënaqësi ë mes partive në fjalë.
“Sa më parë të shkohet në zgjedhje”
Opozita kosovare shprehet se vendi duhet të shkoj në zgjedhje të reja, në pjesën e parë të vitit të ardhshëm.
Shkodran Hoti, zëdhënës i Lëvizjes Vetëvendosje thotë se zgjedhjet do të duhej të ndodhnin sa më parë, por nuk jep një kohë të caktuar se kur qytetarët mund t’i drejtohen kutive të votimit.
“Kërkesa e VV-së për zgjedhje daton që kur kjo qeveri ka shkelur Kushtetutën, duke imponuar marrëveshje të dëmshme për integritetin dhe sovranitetin e vendit, Në vazhdimësi kjo qeveri është përkeqësuar dhe i ka rënë legjitimiteti, ndërsa tani jemi në fazën kur është komplet jolegjitime dhe e pafuqishme për ta vazhduar me mandatin e saj.
Konsideroj se do të duhej të ndodhnin sa më shepjtë, normalisht në pjesën e parë të vitit të ardhshëm”, thotë Hoti, për tesheshi.com.
Edhe Pal Lekaj, shef i grupit parlamentar të AAK-së thotë se sa më parë që mbahen zgjedhjet e parakohshme, aq më mirë do të jetë për vendin.
Ai thotë se shtetin e ka kapluar krimi e korrupsioni dhe zgjedhjet e reja janë e vetmja zgjidhje për të lënë pas gjithë rrëmujën e krijuar, pasi qeveria aktuale ka dështuar të ofrojë një jetë të sigurt dhe më të mirë për qytetarët.
“Aleanca është e përgatitur të shkoj qysh sot në zgjedhje të reja. Nuk duhet vonuar më asnjë ditë që të shpallen zgjedhjen e parakohshme. Zgjedhjet duhet të mbahen gjithësesi afër stinës së pranverës. Muaji mars është kur zgjedhjet duhet të mbahen”, thotë Lekaj, për tesheshi.com.
Edhe Zafir Berisha, deputet i NISMA-s për Kosovën mendon se vendi në muajin mars do të shkohet në zgjedhje të parakohshme.
“Rrethanat politike siç janë duke rrjedhë, muaji mars do të jetë vonë për zgjedhje. Mendoj se marsi nuk mund të tejkalohet sepse koalicioni qeverisës është i dështuar sepse përkundër numrave nuk po arrinë të kalojë shumë gjëra që i ka vë vetes si përgjegjësi”, thotë Berisha, për tesheshi.com.
“Maksimumi në qershor, qytetarët u drejtohen kutive të votimit”
Pavarësisht kërkesës së shpejtë të opozitës për zgjedhje, burime të portalit tesheshi.com bëjnë të ditur se zgjedhje do të ketë vitin e ardhshëm, pasi nuk mund të mbijetojë koalicioni aktual duke parë pakënaqësitë, por që zgjedhjet do të mbahen në muajin qershor e jo në muajin mars.
“Sipas të gjitha gjasave, zgjedhjet do të mbahen në muajin qershor të vitit të ardhshëm. Dy partitë në opozitë AAK e NISMA veç kanë nisur diskutimet me partinë e parë në vend PDK-në për mundësinë e krijimit të koalicionit të ardhshëm qeverisës. Arsyeja pse pritet të mbahen në qershor e jo më herët është se do të ketë kohë më shumë për përgatitje, kurse moti është më i favorshëm. Është përmendur si opsion edhe muaji mars, por koha është e ftohtë dhe është rrezik të organizohen sepse mund të ketë dalje jo të madhe të qytetarëve në votime. Por, një gjë është e sigurt, koalicioni aktual nuk mund të çojë mandatin deri në fund pasi ka përplasje e mospajtimeve të thella mes dy partive që po e udhëheqin vendin”, thotë burimi, i tesheshi.com.
Megjithatë, pavarësisht thirrje të vazhdueshme të opozitës, partia e kryeministrit Isa Mustafa, LDK-ja, vazhdon të besojë se vendi nuk do të shkojë në zgjedhje të reja deri në vitin 2018-të, kur edhe parashikohen të mbahen sipas kalendarit zgjedhor.
Deputeti i LDK-së, Anton Quni në një intervistë të dhënë së fundmi për tesheshi.com ka thënë se për zgjedhjet e reja duhet të vendosin organet e dy partive që e udhëheqin vendin, pra PDK-së e LDK-së dhe jo individë të caktuar.
Nga Blendi Gashi/tesheshi.com
