Komuna e Prishtinës reagoi ashpër ndaj mbledhjes së sotme të kuvendit të këshilltarëve të kryeqytetit.
Në mbledhje, këshilltarët e koalicionit qeverisëse, LDK-PDK votuan kundër rendit të ditës, duke bllokuar në këtë mënyrë shqyrtimin e planit rregullues dhe propozim-buxhetin e vitit 2016.
26 votat e këshilltarëve të koalicionit qeverisës arritën të bllokojnë edhe pikat e tjera të rendit të ditës, të propozuara nga kreu i komunës së Prishtinës, Shpend Ahmeti që vjen nga radhët e Vetëvendosjes.
Këshilltarët e lëvizjes Vetëvendosje kanë braktisur mbledhjen, pasi e panë të pamundur të procedojnë me rendin e ditës.
Këto zhvillime sollën edhe një konferencë të jashtëzakonshme për mediat të kryetarit Ahmeti i cili tha se të gjithë ishin dëshmitarë se as Liburn Aliu e as drejtoria e Urbanizmit nuk janë kurrfarë arsyetimi, por ka një tentativë për të bllokuar punën e komunës, sidomos në urbanizëm.
Ahmeti theksoi se më shumë sesa bllokim të komunës, koalicioni “Sami-Lirak” po bllokon qytetarin e Prishtinës, ashtu siç ka bërë edhe në 15 vitet e fundit.
Ahmeti vuri në dukje se për përfitime personale, po bllokohet kalimi i disa pikave tepër të rëndësishme, si për investime të huaja (qendra e Bankës Raiffeisen), ashtu edhe për banorët e lagjeve të Prishtinës që kanë mbetur peng i planeve rregullative.
“Në këto kushte, ne nuk mund të bëjmë sikur asgjë nuk ka ndodhur dhe të qëndrojmë në sallë, sepse këto janë pika kyçe të punës tonë. Ne treguam gatishmëri si në të kaluarën që të jemi pjesë e debatit, mirëpo këta janë të interesuar ta pësojnë qytetarët”, tha Shpend Ahmeti.
Ndërkaq, nënkryetari, Dardan Sejdiu, tha se koalicioni LDK-PDK e ka motivin e qartë, se është për degradimin e mëtejshëm të qytetit të Prishtinës. “Sot të gjitha vendimet që kanë të bëjnë me rregullimet, janë sjellë nga kryetari i Komunës dhe arsyetimi 6- mujor i Lirak Çelajt dhe Sami Hamitit se nuk do t’i pranojnë propozimet nga Liburn Aliu bie në ujë”, tha Sejdiu.
Ai sqaroi se dy personat në fjalë janë të interesuar që të mos ketë sukses zhvillimi i Prishtinës, mos të ketë sukses lufta kundër korrupsionit, drejtësia sociale, por të vazhdojnë punët që kanë qenë shënjues të një sistemi komplet të kriminalizuar gjatë qeverisjes së 15 vjetëve në Prishtinë./tesheshi.com/
