Dega e PDK në Prishtinë do të dorëzojnë një kallëzim penal në Prokurorinë Speciale ndaj parregullsive në këtë komunë.
Kjo u bë e ditur nga sekretari i kësaj dege, Bujar Cakolli, gjatë prezantimit të “mos realizimit të premtimeve të Shpend Ahmetit”.
Sipas tij, Shpend Ahmeti ka gënjyer qytetarët lidhur me premtimet për furnizim me ujë, për trafikun urban dhe për tregun e prodhimeve vendore.
Sekretari i kësaj dege, Bujar Cakolli, tha se Ahmeti po përvetëson meritat e të tjerëve, si në rastin e ndërtimit të fabrikës së ujit në Shkabaj.
“Ai premtoi se brenda 6 muajve do të bëhej vlerësimi i saktë i rrjedhjeve në rrjetin e ujësjellësit. Brenda 12 muajve ai premtoi se do të bëjë planin për investimet e nevojshme në lagje, për parandalimin e humbjeve të ujit në gjithë rrjetin, kurse brenda 24 muajve Shpend Ahmeti u kishte premtuar qytetarëve të Prishtinës se do të përfundonin të gjitha investimet kapitale dhe qytetarët e Prishtinës do të kenë furnizim të pandërprerë me ujë në të gjitha lagjet e kryeqytetit dhe në rrethina. Gjendja nuk u ndryshua derisa u ndërtua fabrika e përpunimit të ujit në Shkabaj, ndonëse me propagandën e tij është munduar t’i përvetësojë meritat e ndërtimit të saj”, tha ai.
Cakolli shtoi se Shpend Ahmeti nuk ka asnjë kontribut të vetëm përveç statuseve në facebook, e që sipas tij, po manipulon qytetarët për çështjen e ujit.
Sipas Cakollit, edhe tregu i prodhimeve të vendit është një premtim i pa përmbushur i kryetarit aktual Shpend Ahmeti.
“Tregu “Duaje Tënden” i prodhimeve të vendit po ashtu është një premtim i pa përmbushur i kryetarit të Prishtinës. Ahmeti premtoi se do të jetë një treg pa pagesë për prodhuesit vendorë, gjithashtu në të gjitha tregjet ekzistuese ishte premtuar për një ndarje të një pjese vetëm për promovimin dhe shitjen e prodhimeve vendore, bujqësore kur prodhuesit do të kishin edhe disa lehtësime shtesë. Ishte premtuar edhe lehtësimi në organizimin të bujqve vendor në aktivitetet e grumbullimit dhe ruajtës së prodhimeve vendore por asnjë nuk është përmbushur”, tha ai.
Sekretari i Degës së PDK-së në Prishtinë, Bujar Cakolli, tha se dështim i Shpend Ahmetit është edhe rregullimi i trafikut të Prishtinës, sipas të cilit premtimi i këtij të fundit për reformim të thellë nuk ka ndodhur.
“Premtimi i vetëm i përmbushur është në raport me partinë e tij, duke politizuar tërë administratën e Prishtinës, duke punësuar paligjshmërisht afër 500 militantë të Vetëvendosjes, duke u dhënë tendera kompanive të afërta me Vetëvendosjen, duke punësuar militantë në Ndërmarrjen e Banesave, duke bërë biznes me leje ndërtimore, si dhe duke kapur dhe shfrytëzuar gjithçka që ishte publike për partinë e tij, për vete”, tha Cakolli. /tesheshi.com/
