Nga Blendi Gashi
Pak kush besoi para zgjedhjeve të 11 qershorit besoj se Fatmir Limaj do t’i shtrëngojë duart me Kadri Veselin dhe do të lidhin koalicion parazgjedhor dhe më pas do bashkëqeverisin, kjo për shkak të largimit të “Çelikut” nga PDK-ja dhe prishjes së raporteve me Thaçin.
Por tashmë kjo është një fakt dhe shokët e luftës janë pjesë e qeverisë “Haradinaj”. Megjithatë duket se ky është ribashkim prej zori dhe se Veseli e Limaj nuk është se duan ta shohin fort njëri-tjetrin me sy, çka u dëshmua edhe ditën e përmbylljes së fushatës zgjedhore për nacionalet e 11 qershorit, ku Limaj hezitoi jashtëzakonisht të dalë në skenë të përmbyllë fushatën bashkë me kreun e PDK-së, por që e bëri pas lutjeve të tashmë kryeministrit Haradinaj.
Miqësinë e tyre të dikurshme duket se nuk e ka kthyer as pushteti dhe ata vazhdojnë të jenë “armiq” mes tyre dhe kjo është dëshmuar edhe gjatë fushatës zgjedhore për lokalet e 22 tetorit, ku ndihet jo pak një “luftë” mes PDK-së e NISMA-s në komuna të caktuara, e sigurisht më së shumti në vendlindjen e Limajt në Malishevë.
Dhe “baruti” i Malishevës tashmë është bartur edhe brenda qeverisë, pasi janë dy zyrtarë të lartë të këtyre dy partive që janë emëruar si zv.ministra të Ministrisë së Bujqësisë që udhëhiqet nga serbi Nenad Rikalo, sigurisht jo për ta monitoruar këtë të fundit por për të “ngacmuar” dhe monitoruar njëri-tjetrin.
Dy “armiq” nga Malisheva, zv.ministra të Bujqësisë…
Është PDK-ja e Kadri Veselit ajo që hapur i ka shapllur “luftë” Limajt në qeveri. Pak ditë pasi që NISMA emëroi për zv.ministër të Bujqësisë, Vesel Krasniqin, është kundërpërgjigjur PDK duke e emëruar poashtu në pozitën e zv.ministrit të Bujqësisë kundërshtarin më të madh të Limajt nga Malisheva, ish-kryetarin Isni Kilaj.
Edhe pse PDK-ja mund të thotë se është një emërim i zakonshën dhe nuk ka të bëjë asgjë me rivalitetin politik që kanë me NISMA-n në Malishevë, përzgjedhja e Kliajt tregon qartë se Veseli e sheh ndër “armikun” më të madh politik Limajn dhe sikur dëshiron ta monitorojë nga afër, pasi ka mundur fare lehtë ta lë si zv.ministër të Financave, pozitë që e mbajti Kilaj gjatë qeverisë “Mustafa”.
Mbetet të shihet se ç’kontribut do japin dy zv.ministrat e Bujqësisë, Kliaj e Krasniqi në një dikaster tejet të rëndësishëm si është bujqësia, i cili udhëhiqet nga një politikan i komunitetit serb, nga i shumëpërfoluri Rikalo i cili akuzohet se gjatë luftës ka keqtrajtuar shqiptarët në Prishtinë.
Sigurisht se do të kuptohet nëse do të “monitorojnë” punën e Rikalos, pasi bujqit kosovarë janë të zhgënyer me emërimin e tij dhe hapur kanë shprehur frikën se nuk do kenë përkrahjen si vitetet paraprake, apo do të “monitorojnë” njëri-tjetrin që në zgjedhjet tjera eventuale të bëjnë akuza të ndërsjella.
Kujtojmë se Kiiaj dhe Krasniqi kanë qenë së bashku në PDK deri në themelimin e NISMA-s ku ky i fundit u bë krah u Limajt.
Kilaj ka qenë kryetar i Malishevës për dy mandate, ku Krasniqi ka mbajtur pozitën e drejtorit të Financave. /tesheshi.com/
