Nga Blendi Gashi
Janë bërë pesë vjet që kur u arrit një marrëveshje mes liderit të atëhershëm të Partisë Demokratike të Kosovës (PDK), Hashim Thaçi, atij të Lidhjes Demokratike të Kosovës (LDK) Isa Mustafa dhe të Aleancës Kosova e Re (AKR), Behgjet Pacolli, për reformën kushtetuese dhe zgjedhore, por një gjë e tillë nuk është realizuar kurrë.
Sipas burimeve të portalit tesheshi.com, dy partitë në pushtet PDK dhe LDK janë duke biseduar dhe janë në rrugë të mirë që të merren vesh që të rikthehen listat e mbyllura zgjedhore.
Listat e mbyllura po shihet si mundësi ideale e vazhdimit të mbijetesës në politikë të figurave të shpenzuara politike, kryesisht të dy partive në pushtet, por edhe që kryetari i partisë dhe Kryesia të vendosin se kë duan ta bëjnë deputet.
Pra, ky sistem shihet si i përshtatshëm, për shkak se në njëzetëshen apo edhe në dyzetshën e parë, liderët e subjekteve politike do të përpiqen të fusin të gjithë ata kandidatë të cilët janë të dëgjueshmit e liderit.
Para disa ditësh kryeminsitri, Isa Mustafa, paralajmëroi se së shpejti do të filloj reforma zgjedhore por nuk dha më shumë detaje.
Opsionin e mbylljes së listave e kanë përmendur edhe politikanë të ndryshëm si dhe përfaqësues ndërkombëtar, siç thuhet për shkak të manipulimeve të shumta ndërmjet kandidatëve për shkak të listave të hapura.
Baraliu: Mbyllja e listave u jep më shumë fuqi liderëve
Ish kryetari i Komisionit Qendror të Zgjedhjeve (KQZ), Mazllum Baraliu,thotë se mbyllja e listave u jep më shumë fuqi liderëve të partive për të kontrolluar bartësit e listës.
“Listat e mbyllura në fakt nënkuptojnë hermetizëm edhe më të madh, sepse aty votohet për partinë dhe mandej ndahen votat nga liderët, ose lideri dhe rrethi i ngushtë politik i liderit për njerëzit më të preferuar dhe më të dëgjueshëm, kështu që më kjo nuk është formë demokratike, sikur që është aktualisht sistemi proporcional me lista të hapura që aktualisht kemi ne, sepse nuk lejon mundësinë që njerëzit e zgjedhur ta fitojnë besimin, qoftë që edhe duke qenë në fund të listës të fitojnë më shumë vota dhe të dalin në krye të listës”, ka deklaruar Baraliu, ekspert i legjislacionit zgjedhor.
Kurse, i pyetur rreth uljes së pragut zgjedhor, Baraliu thotë se është mire të ndodh ulja e pragut zgjedhor në 3% nga 5 % sa është aktualisht.
“Për partitë e vogla, për shoqatat e ndryshme qytetare, për njerëzit që dëshirojnë ta begatojnë skenën politike në Kosovë është shumë vështirë ta kalojnë pragun aktual prej 5 %, andaj më real është ai 3%”, shprehet Baraliu, për tesheshi.com.
Sherifi: S’besoj se do të rikthehen listat e mbyllura
Bilall Sherifi, nga partia opozitare NISMA për Kosovën nuk beson se do të rikthehet sistemi i listave të mbyllura zgjedhore, pasi thotë se për të ndodh një gjë e tillë duhet të bëhet ndryshimi i Kushtetutës.
“Prandaj vetëm reformat të cilat kërkojnë vetëm mdryshimin e ligjit mbi zgjedhjet janë të mundshme”, thotë Sherifi, për tesheshi.com.
Kurse, sa i përket uljes së pragut zgjedhor, Sherifi pohon se subjekti ku ai vepron NISMA për Kosovën nuk ka asgjë kundër që pragu zgjedhor të uletë në 3%.
Ndryshe, në Kosovë fillimisht u aplikuan listat e mbyllura, mirëpo për shkak të kritikave të shumta nga shoqëria civile dhe ndërkombëtarët, këto lista u hapën. Megjithëse u prit që listat e hapura do ta relativizojnë fuqinë e liderit të partisë, një gjë e tillë nuk ndodhi. /tesheshi.com/
