Komisioni për buxhet dhe financa edhe pse sot pritej të diskutonte për projektligjin e buxhetit për vitin 2017-të, një gjë e tillë nuk ka ndodhur.
Për të raportuar për çështjen e buxhetit në komision prezent ishte edhe ministri i Financave Avdullah Hoti, por ai mori rrugën kot deri në Kuvend, pasi komisioni me shumicë votash vendosi që diskutimi për çështjen e buxhetit të shtyhet për javën e ardhshme.
Kërkesa u bë nga bashkëpartiaku i Hotit, kryetari i komisionit, Naser Osmani i cili kërkesën për shtyerjen e diskutimit për buxhetin e arsyetoi me faktin se “materiali i projektligjit është i palexueshëm”.
Por, duke parë problemet dhe dallimet e mëdha që kanë dy partitë në pushtet PDK dhe LDK për çështjen në fjalë, arsyetimi i dhënë është tërësisht i paqëndrueshëm dhe është bërë sa për të mbuluar pakënaqësinë mes subjekteve në fjalë.
Një gjë të tillë e konfirmojnë edhe burime të sakta të portalit tesheshi.com brenda komisionit për buxhet dhe financa, duke thënë se disktuimi për buxhetin nuk është shtyrë për çështje teknike.
“Shtyerja e diskutimit për buxhetin është bërë me arsyetim për çështje teknike, por kjo është tërësisht e pavërtetë.
Arsyeja e saktë pse diskutimi për buxhetin sot dështoi, është se Partia Demokratike e Kosovës (PDK) ende nuk e ka diskutuar çështjen e buxhetit. PDK do të mbledhet nesër me kryetarët e komunave, ministrat e saj, zv.ministrat ku do të diskutojë hollësissht buxhetin dhe do të marrë një vendim, pasi PDK ende nuk është në pajtim për buxhetin e propozuar”, ka thënë burimi.
As opozita aspak nuk beson se çështjet teknike janë arsyeja pse sot nuk u diskutua në komisionin për buxhet, çështja e projektligjit për vitin 2017-të.
Enver Hoti, deputet nga partia NISMA për Kosovën nuk beson se arsyetimi i dhënë nga kreu i komisionit Naser Osmani se “materiali i projektligjit është i palexueshëm”, është shkaku pse sot nuk u diskutua në komision për buxhetin.
“Po është shtyrë mbledhja e komisionit për javën tejtër. Arsyeja e dhënë nga partitë në koalicion mendoj se nuk është reale. Besoj fuqishëm se shtyerja ka ndodh për shkak se dy partitë në koalicion PDK dhe LDK kanë mospajtime të thella dhe për këtë nuk u disktua për buxhetin”, thotë Hoti, për tesheshi.com.
Ditë më parë portali ynë ka shkruar se projektbuxheti 2017-të sipas të gjitha gjasave pritet të jetë “mollë sherri”, mes partnerëve të koalicionit qeverisës.
Më i zëshmi kundër buxhetit është zv.ministri i Fianancave nga PDK-ja, Isni Kilaj, i cili ka thënë buxheti është joreal dhe ka kërkuar që të mos votohet.
Ndryshe, 20 dhjetori është një prej datave kur projektligji për buxhetin mund të dërgohet për diskutim dhe më pas votim në Kuvendin e Kosovës.
Përgatiti: Blendi Gashi – /tesheshi.com/
