Ndërsa policia nuk ka ndaluar ende të dyshuarit që sulmuan bashkëshorten e ministrit në detyrë të Zhvillimit Ekonomik, njëherësh zëdhënësit të PDK-së Blerand Stavileci, drejtues të kësaj partie përmes një konference të jashtëzakonshme për media nuk kanë hezituar të akuzojnë Vetëvendosje-n për sulmin.
Nënkryetari i PDK-së, Uran Ismaili, tha se gruaja e Stavilecit është rrahur nga “kriminelë të Vetëvendosjes”, ndërsa ka shtuar se pas sulmit asaj i është thënë që të porosisë bashkëshortin të mos flasë më për udhëheqjen e Prishtinës.
“Zhvillimet e rënda që kanë ndodhur sot në mesditë e bëjnë të jashtëzakonshme konferencën. ‘Kriminelët e VV-së’ kanë sulmuar dhe rrahur brutalisht bashkëshorten e ministrit, kolegut dhe bashkëpartiakut tonë. Vitore Stavileci, para se të jetë bashkëshorte është nënë është motra e dikujt dhe grua shqiptare. Pas sulmit fizik, Vitores i është thënë që të porosisë Blerandin që të mos flasë më. Prapa sulmit janë njerëzit që duan të helmojnë shtetin dhe të dëmtojnë familjet e çdo kujt që nuk mendon si ta”, tha ai.
Kurse Blerta Deliu-Kodra, deputete e PDK-së, kërkoi nga organet e rendit të kapin sa më parë autorët e rrahjes së Vitore Stavilecit.
“Kërkojmë që sa më parë të vihet në vend drejtësia. Organet e rendit duhet të kapin autorët e kësaj rrahjeje”, ka thënë Deliu duke akuzuar Vetëvendosjen.
Deliu ka thënë se ky qëndrim i tyre, ka nisur fillimisht me diskurs të urrejtjes e tani po kthehet në dhunë.
“Ata po djegin vetura private, po shkatërrojna prona private.Kjo është e papranueshme nga PDK-ja, që të tolerohet gjuha e urrejtjes nga Vetëvendosja”, ka thënë ajo duke shtuar se gjithçka nisi si gjuhë politike dhe diskurs i urrejtjes e tani u kthye në dhunë të ashpër.
Bashkëshortja e Stavilecit pas lëndimeve të marra nga sulmi i sotëm po trajtohet në QKUK. /tesheshi.com/
