PDK-ja e Kadri Veselit, Dega në Prishtinë, sërish ka hedhur akuza në drejtim të Vetëvendosjes për keqqeverisje në Prishtinë, ku ka prezantuar me emra dhe mbiemra siç thotë, të punësuarit partiakë në shkollat e kryeqytetit.
Anëtarja e kryesisë së PDK, njëherësh ministrja në detyrë e Drejtësisë, Dhurata Hoxha, tha se kryekomunari, Shpend Ahmeti, më shumë është një i qeverisur nga Kurti dhe Molliqaj, se po qeveris vetë Komunën e Prishtinës.
Hoxha ka thënë se për 4 vjet, Ahmeti nuk ia besoi asnjë prishtinasi udhëheqjen e arsimit dhe shkollat e saj i mbushi përplot me militantë të Vetëvendosjes nga komunat e tjera të Kosovës.
“Qysh në muajt e parë, Shpend Ahmeti, me direktiva të Vetëvendosjes, i politizoi deri më themel shkollat me drejtorë e staf administrativ prej komunave të tjera, emra këta që i vinin atij prej Sekretariatit të Vetëvendosjes”, tha ajo.
Hoxha, tregoi se Ahmeti ua kishte ndërprerë menjëherë kontratat e punës shumë drejtorëve, pa vlerësuar fare performancën atyre.
“I largoi drejtorët e shkollave me kriter partiak dhe zgjodhi drejtorë të tjerë militantë të Vetëvendosjes, duke shpërfillur edhe vërejtjet ligjore të zyrtarëve të MASHT-it në komisionet për zgjedhje të drejtorëve”, ka thënë Hoxha.
Ajo ka shtuar se partia Vetëvendosje, përveçse politizoi dhe rrezikoi nxënësit duke i nxjerrë nga mësimi në protestat e dhunshme, i keqpërdori edhe hapësirat shkollore, duke organizuar ligjërata politike për promovimin e politikave anarkiste dhe për përgatitjen e pankartave në objektet shkollore.
“Partia Vetëvendosje nuk e ndërtoi asnjë shkollë të vetme në Komunën e Prishtinës”, theksoi ajo.
Ndërsa, zyrtari tjetër i PDK-së të Degës së Prishtinës, Ilirik Musliu tha se për shkak të emërimit në shkollat e Prishtinës të militantëve të VV-së nga të gjitha komunat, kuadrot prishtinas vazhdojnë të jenë të papunë dhe të pashpresë se ndonjëherë do u vije radha t’a përmbushin veten profesionalisht.
Hoxha bashkë me Musliun, prezantuan edhe militantët e Vetëvendosjes nga komunat e tjera të rehatuar në shkollat e Prishtinës, emrat e të cilëve mund t’i lexoni në fotot më poshtë.
