“Koalicioni i luftës” me në krye Ramush Haradinajn e Kadri Veselin ka reaguar pas thirrjes së Adem Mikullovcit për të vijuar seancën konstituive të Kuvendit tëë Kosovës, të enjten.
PDK-AAK-Nisma e ka quajtur vendimin e tij arbtirar, duke lënë të nënkuptohet se nuk do marrin pjesë në seancë.
“Me këtë vendim të njëanshëm, kryesuesi i seancës konstituive është vënë të shërbim të plotë vetëm të një subjekti politik, duke shkelur edhe parimin mbi të cilin ka ndodhur takimi i kaluar konsultues mes subjekteve politike parlamentare. Ky vendim i kryesuesit dëshmon se ai, bashkë me partinë Vetëvendosje, janë të interesuar që ta thellojnë edhe më shumë bllokadën në Kuvendin e Kosovës dhe jo të gjejnë një zgjidhje të përbashkët me grupet e tjera parlamentare”, thuhet në reagimin e PAN-it.
Ky koalicion thotë se qëndrimin për pjesëmarrje në vazhdimin e seancës do e japë pas takimit konsultativ të vendosur me pajtueshmëri mes shumicës së subjekteve politike, që do të mbahet të mërkurën në orën 10:00.
“Koalicioni jonë është i bindur se oferta për shmangien e krizës përmes votimit të kryeparlamentarit dhe kryeministrit të ri me marrëveshje politike, do të përkrahet prej shumicës së subjekteve politike parlamentare”, thuhet në reagim.
PAN thotë se zgjedhja e të nominuarit të tyre për kryekuvendar, Kadri Veseli, si dhe e të nominuarit për kryeministër, Ramush Haradinaj, përkundër përpjekjeve të tashme bllokuese në Kuvendin e Kosovës, janë procese të pandalshme politike. /tesheshi.com/
