PDIU ka reaguar zyrtarisht në lidhje me kërkesën e PD-së drejtuar prokurorisë, sipas të cilës ngrihen dyshime se deputeti Aqif Rakipi është subjekt i ligjit për dekriminalizimin dhe duhet t´i ndërpritet mandati.
Në një deklaratë për mediat, PDIU shprehet se Basha sulmon deputetin Aqif Rakipi pas nuk e përtyp dot humbjen në Elbasan dhe faktin që mund të dalë edhe forcë e tretë.
“Është për të ardhur keq që dramën e humbjes me pazar të zgjedhjeve dhe mbi të gjitha dërrmimin e tij në Qarkun e Elbasanit, Lulzim Basha, kërkon ta transferojë diku tjetër.
Aqif Rakipi është verifikuar dhe stërverifikuar nga institucionet ligjzbatuese për drekriminalizimin dhe zyrtarisht Interpoli dhe Prokuroria kanë deklaruar se nuk ka të dhëna për implikimin e tij.
Ai është deputet për herë të dytë, me një mbështetje të madhe në Elbasan, dhe duket se kjo është hal në sy për Partinë Demokratike, që rrezikon të mbetet fuqi e tretë politike në atë qark.
Partia Drejtësi, Integrim dhe Unitet i bën thirrje Lulzim Bashës të mos transferojë problemet e brendshme diku tjetër dhe të mos vazhdojë me nenin e agjitacion-propagandës të komunizmit, por të kuptojë se në shtetin ligjor ka detyrimin të paraqesë fakte dhe jo të detyrojë 37 deputetë të firmosin fletërrufe për të ushtruar trysni ndaj prokurorisë.
Aqif Rakipi ka qenë dhe mbetet i hapur për çdo investigim, sa herë këtë ta kërkojë kushdo, por shpifjet nuk mund të përbëjnë element të jetës politike të vendit tone”, thuhet në reagimin e PDIU-së. /tesheshi.com/
