Partia Demokratike është pozicionuar “pro” heqjes së të drejtës së votës për një kategori të dënuarish. Oerd Bylykbashi, tha për Top Channel se një masë e tillë është përkrahur dhe nga Gjykata Europiane e të drejtave të njeriut.
“Një raport dërguar për dekriminalizimin na dha një seri rastësh kur personave të dënuar për krime të rënda u është hequr e drejta e votës. Kjo ka ndodhur shumë shpesh në Europë. Kjo është një praktikë europiane që na ka dhënë mundësinë që bazuar mbi vendime e Gjykatës Europiane të të Drejtave të Njeriut të ndërhynim me një platformë publike dhe të përfshinim këtë”, tha njeriu që mbron cështjet ligjore dhe juridike në PD.
Por sakaq, përfaqsuesja e BE-së në Tiranë, Romana Vllahutin e ka quajtur masën në fjalë si anti-kushtetuese.
“Është hera e parë në jetën time që dëgjoj që ndokush ka patur ndonjë ide të tillë. Jam e sigurtë që ky duhet të jetë një interpretim i gabuar, sepse ajo që kemi kuptuar ne është se ata që kanë kryer krime, nuk mund të kandidojnë dhe nuk mund të votohet për ta, por ama të gjithë kanë të drejtën për të votuar dhe kjo është e panegociueshme dhe baza e demokracisë”, deklaroi znj. Vllahutin në Top Story.
Kjo masë që do të aplikohet për hërë të parë në zgjedhjet e përgjithshme të 18 qershorit, ndërrmeret në kuadër të ligjit të dekriminalizimit. /tesheshi.com/
