PD ka njoftuar një “vetting” brenda radhëve të saj, jo në funksion të partisë nga figurat e përfolura, por në funksion të përzgjedhjes së kandidatëve të saj për zgjedhjet lokale. Një pozicion paradoksal ky pasi ende kjo forcë nuk ka konfirmuar pjesëmarrjen në to, ndërkohë që e larguar nga parlamenti me djegie mandatesh, përcjell mesazhin e bojkotit të këtyre zgjedhjeve me Ramën në krye të qeverisë.
Sipas PD-së, çështjen e kandidatëve e kanë marrë në dorë konservatorët britanikë, pasi do jenë ata aplikuesit e vettingut.
“Partia Demokratike është në fazën finale të përgatitjes së modelit për përzgjedhjen e kandidatëve të saj nga anëtarësia. Për këtë qëllim, janë prej dy ditësh në Tiranë Davis Jones, Kryevlerësuesi i Komitetit të Seleksionimit të Kandidatëve të Partisë Konservatore Britanike dhe Joy Morrissey, ish kandidate konservatore për Bashkinë e Londrës. Përfaqësuesit e lartë të Partisë Konservatore Britanike po ndihmojnë Partinë Demokratike duke ofruar përvojën e konservatorëve britanikë në procesin e përzgjedhjes se kandidatëve demokratë për zgjedhjet parlamentare dhe lokale.
Modeli britanik që do të zbatohet në Partinë Demokratike, i shërben Partisë Demokratike edhe si një Vetting brenda partisë, i cili jep mundësinë e zgjedhjes së kandidatëve më të përshtatshëm që do të përfaqësojnë PD në parlament dhe në pushtetin lokal”, thuhet në një deklaratë të partisë më të madhe opozitare, për momentin e dalë jashtë sistemit. /tesheshi.com/
