Partia Demokratike i ka thënë një “Jo” të fortë e të vendosur propozimit më të fundit amerikan mbi reformën në drejtësi, përcjellë nga Zëvëndës-Sekretarja Nuland tre ditë më parë, gjatë vizitës së saj në Tiranë, me kush arritjen e konsensusit për ta votuar reformën.
Dhe kjo “Jo” e pazakontë në raportet mes politikës shqiptare dhe asaj amerikane, ka sjellë dhe reagimin e menjëhershëm të ambasadorit Donald Lu. “Jemi të zhgënjyer me përgjigjen e zotit Basha ndaj propozimit hibrid për reformën në drejtësi”, ka deklaruar kreu i diplomacisë amerikane në Tiranë.
“Propozuam një zgjidhje në mirëbesim, gjysmën nga qeveria dhe gjysmën nga opozita. Z. Basha propozoi diçka që ai vetë ka pranuar se është në konflikt interesi dhe jo në përputhje me paragrafin 61 të Opinionit Përfundimtar të Komisionit të Venecias. Jemi duke vazhduar bisedën me të dyja palët në përpjekje për t’i sjellë përsëri tek mbështetja për propozimin hibrid diskutuar nga Ndihmës-Sekretarja Nuland të dielën”, u shpreh Lu gjatë një prononcim për Top Channel. /tesheshi.com/
