Partia Demokratike nuk i është ndarë as këtë të shtunë akuzave për ministrin e Brendshëm, Saimir Tahiri për përdorim të makinës së tij në trafikun e drogës. Edhe pse ministry deklaroi se e ka shituar makinën në fjalë, sipas deputetit Strazimit, kjo është një shkelje që ai e pranon edhe vetë.
“Zotëria AA 003 GB, po të ishte deputet anti-Rama sot do të ishtë në burg për dëshmi të rreme. AA 003 GB thotë që ka shitur një makinë luksi në të zezë, si berberët që guxojnë të rruajnë dhe të qethin pa kasë, por zotërisë nuk i hyn gjemb në këmbë”, tha deputeti demokrat, Strazimiri.
Shpjegimin përse Tahiri nuk është në burg, deputeti e “gjen” te fakti që sipas tij, qeveria nuk ka armik banditët e trafikantët por berberët dhe shitësit ambulantë, duke i ndërlidhur akuzat me aksionin e fundit kundër informalitetit.
“Qeveria armik ka shpallur invalidin e papunë, tregtarin që punon me djersë, por jo ministrin që ka shkelur Kodin Penal në mënyrë të përsëritur, siç e pranon edhe vetë”, deklaroi Strazimiri. /tesheshi.com/
