Pas deklaratës së Kryeministrit në lidhje me koncensionet për check-upin dhe dializën, reagoi Partia Demokratike, nëpërmjet deputetes Albana Vokshi, e cila u shpreh se nën presionin e denoncimeve të Partisë Demokratike, dhe të një pjese të medias së lirë, Edi Rama sot u detyrua të përgjysmojë ryshfetin e tij me konçesionin e check-up-it.
“Ndërkohë që e kishte paracaktuar fituesen e këtij koncesioni, donatoren e tij Vilma Nushi, me ofertën më të lartë në garë, 25 përqind më shumë se konkurrentët e tjerë, çka do të thotë 18 milionë euro dëm shtetit, 18 milionë euro dëm parave të shqiptarëve, pra kishte planifikuar se do t’i jepte të përzgjedhurës së tij 120 milionë euro, sot del dhe thotë se ka ndërmend t’i japë 64 milionë dollarë”,- tha Vokshi.
Demokratja e cilësoi këtë si një skandal ku Rama, Beqaj dhe donatorja e tij janë kapur në flagrancë, duke vjedhur fondet e shëndetësisë, duke vjedhur paratë e shqiptarëve, duke manipuluar shifrat e check-up, për grup moshën 40-65 vjeç, një target grup prej 920 mijë personash.
“Edi Rama kishte planifikuar që të ndante me Vilmën e tij paratë për kontrollin e 920 mijë personave, edhe pse të dhënat zyrtare tregojnë se vetëm 20 përqind e kësaj grupmoshe e bëjnë check-up-in. Pas fushatës dhe denoncimeve të Partisë Demokratike, Edi Rama pranoi se do t’i japë para Vilmës së tij, jo për 920 mijë persona, por për 475 mijë”,- u shpreh ndër të tjera Vokshi./tesheshi.com/
