Përpara se të flasë në Kuvend shefja e diplomacisë së Bashkimit Europian, Federica Mogherini, PS-ja dhe PD-ja kanë arritur një marrëveshje për të zbatuar ligjin e dekriminalizimit.
Mbledhja e Këshillit të Rregullores dhe Mandateve e të Imuniteteve e cila ishte parashikuar të niste në orën 14:00 filloi në 15: 30, pasi u arrit dakordësi mes përfaqësuesve të PS dhe PD-së.
Dakordësia është rënë për një sërë pikash të formularit të vetëdeklarimit.
PD kërkon që këto identitete të vetëdeklarohen dhe më pas të bëhen verifikimet nga institucionet përgjegjëse
Arritja e marrëveshjes u kushtëzua nga PD-ja me mosfillimin e Kuvendit, duke bërë që dhe ky i fundit të ndërpresë punimet deri në një moment të dytë. Sot në orën 19.00 pritet që përfaqësuesja e lartë e BE-së të mbajë fjalën në Kuvend.
Zëdhënësja e Komisionit Evropian, Maja Koçijançiç tha se Mogherini vjen në Tiranë që të zbatohet ligji për demikriminalizimin, i cili po diskutohet në Parlamentin e Shqipërisë.
“Në dhjetor kur ligji i dekriminalizimit u miratua, BE e mirëpriti miratimin unanim. Tani fokusi është te zbatimi. Duhet të miratohen disa akte dhe puna vijon dhe ne besojmë se është e rëndësishme që Shqipëria të zbatojë ligjin e dekriminalizimit sepse do të jetë një sinjal për të rritur besimin e qytetarëve dhe integritetin e shtetit dhe funksionimin e duhur të institucioneve”, tha zëdhënësja e Mogherinit. /tesheshi.com/
