Për Partinë Demokratike, në grabitjen e pazakontë të miliona eurove në aeroportin e Rinasit, ngjarje e ndodhur dy ditë më parë, kanë gisht vetë krerët e policisë shqiptare. PD akuzon direkt kryeministrin Rama dhe ministrin e Rendit, Tahiri, se po duan ta mbajnë nën mjergull në këtë ngjarje derisa ajo të kalohet dhe cila ëshët arsyeja sipas sekretarit të selisë blu për çështjet e Rendit dhe Sigurisë:
“Rama dhe Tahiri po mbajnë të fshehta disa fakte tronditëse në lidhje me grabitjen në pistën e aeroportit të Rinasit. Fakte që dëshmojnë implikimin e shefave të rëndësishëm të Tahirit në këtë histori. Fakte të pakundërshtueshme tregojnë se policia është njoftuar nga autoritetet e aeroportit brenda nj minuti, pra sapo ngjarja ka ndodhur, por përgjigja ka qënë se furgoni i policisë ndodhet në pistë për të pritur dhe shoqëruar persona të deportuar. Edhe pse një furgon i grupit të gatshëm gjendej aty i dislokuar, pas sulmeve të Stambollit, policia ka arritur në vendngjarje vetëm pas 30 minutash. Dy akset e vetme nga mund të ikin grabitësit, ai nga Rinasi në Tiranë dhe Rinas-Fushe Krujë, nuk u bllokuan nga policia në kohën e duhur”, tha Alibeaj.
Më pas, ai përmendi shumën e 10 milion eurove të grabitura dhe shtoi se “Rama-Tahiri, po tentojnë të servirin të dhëna të gënjeshtërta për shumën e grabitur, duke u përpjekur të zvogëlojnë përmasat e grabitjes me armë e me maska në pistën e avionëve, ndërsa e vërteta është se bëhet fjalë për disa milionë euro”.
Për partinë më të madhe të opozitës shqiptare, padyshim që ajo çfara ka ndodhur në aeroportin e Rinasit, ëshët një prej goditjeve më të mëdha që ka pësuar siguria publike dhe ajo kombëtare në vend. /tesheshi.com/
