Partia Demokratike dhe aleatët e saj përmbyllën me një tubim fushatën për zgjedhjet e 11 shtatorit për kryebashkiakun e ri të Dibrës.
Të pranishëm përveç shtabit elektoral të kandidatit Sherefedin Shehu dhe kreut të partisë Demokratike, Lulzim Basha që ka qëndruar në Dibër gati gjatë gjithë fushatës, ishin edhe Dashamir Shehi, Nard Ndoka si dhe kreu i Aleancës Kuqezi, Kreshnik Spahiu.
Kreu i Partisë Demokratike, Lulzim Basha në fjalën e tij u përqendrua veçanërisht tek projekti i rrugës së Arbrit, teksa u kërkoi votën dibranëve për kandidatin e djathtë Sherefedin Shehu.
Duke e cilësuar si dibranin shembullor, Basha tha se kandidati Shehu ka tre veçori, mençurinë, punën dhe ndershmërinë si prind, si familjar si menaxher dhe politikan dhe nesër si kryebashkiak i Dibrës.
Duke u ndalur tek rruga e Arbrit, Basha akuzoi kryeministrin se kërkoi të përdorte paratë e qeverisë kineze për vete, ndërsa projektin e ka varrosur tashmë. Basha tha se kontrata për tunelin ishte në tavolinën e kryeministrisë.
“Dje ambasadori i SHBA-ve bëri thirrje që të largojmë vrasësit e trafikantët nga Parlamenti. Rama i ka dhënë liri krimit të bëjë çdo gjë dhe kriminelët e kanë kapur shtetin”, tha Basha, duke shtuar se dibranët duhet të zgjedhin Sherefedin Shehun për kryetar të bashkisë.
“Sot nga ky shesh i entuziazmit dhe fitores, dua t’u them atyre që na ndjekin se realitetin duhet ta shohim pa zbukurime dhe gënjeshtra të qeverisë. Keni parë banda që vijnë vërdallë, banditë të importuar, që sillen si çamër por që s’kanë asgjë të përbashkët as me çamë dhe as me dibranë pasi janë horra”, tha Basha. /tesheshi.com/
