Në kampin e opozitës nuk ekziston asnjë mëshirë politike ndaj ndoshta më të urryerit të saj, pas Edi Ramës, ish-kreut të Rendit Saimir Tahiri. Një tjetër dalje e këtij të fundit para medias e publikut për të sqaruar se gjithçka është politikë llumi ndaj tij, e se ai nuk ka asnjë implikim në dosjen “Habilaj”.
“Çdo qytetar shqiptar do të ishte në burg me këto prova…”, tha deputeti demokrat Alibeaj, duke iu referuar dosjes.
Ndërsa pretendimeve të deputetit Tahiri se ai nuk mund të arrestohet gjersa prokuroria e Katanias nuk ka asnjë procedim ndaj tij, Alibeaj iu përgjigj:
“Prokuroria e Katanias po procedon anëtarët e bandës që kanë kryer aktivitet kriminal në Itali dhe nuk e ka për detyrë të procedojë Tahirin në Tiranë”, tha demokrati që mbulon Rendin dhe Sigurinë në selinë blu.
Reagimet vijnë një ditë para votimit në parlament të dy raporteve mbi Tahirin, ai që e çon në burg e ai që e lë jashtë. Me gjasë do fitojë ky i dyti dhe Tahiri nuk do jetë nën një strehë me ata që janë aty, pas hekurave, e që kanë rënë për shkak të tij. /tesheshi.com/
