Opozita shqiptare vijon të akuzojë kreun e qeverisë, Rama duke i mëshuar akoma dhe më shumë një gjuhe populiste të instaluar prej kohësh në ligjërimin e saj.
Këtë të shtunë, PD shfrytëzoi të qënit e kryeministrit në Itali duke e përshkruar si një fundjavë luksi, dhe nga ana tjetër duke i vënë përballë raste tragjike shqiptarësh.
“Po bëhen 24 orë që Edi Rama shijon fundjavën e luksit në Firence dhe nuk ka pse shqetësohet pse një kryefamiljar i dha fund jetës se s’paguante dot energjinë, një fëmijë i vogël vdiq nga i ftohti pasi bashkë me familjen jetonte në kushte tejet të vështira, apo se një person humbi jetën dje në Tropojë duke u munduar të nxjerë bukën e fëmijëve, apo se mijëra shqiptarë po vidhen nga mbifaturimet e energjise nga OSHE. Sot, shqetesimi i vetëm i Edi Ramës është luksi i tij dhe miqve të tij”, ishte kjo deklarata e Sekretarit të Përgjithshëm të selisë blu, Arben Ristani.
Aludimi është i qartë: Me Ramën në qeverisje, shqiptarët jo thjesht po vuajnë; ata po vdesin! /tesheshi.com/
