Partia Demokratike vijon të ngulmojë për zbatimin e plotë të rekomandimit 88 të Komisionit të Venecias për reformën në drejtësi.
Vetë kreu i opozitës, Lulzim Basha ka ngulmuar edhe një herë në këtë pikë. Ai ka folur sot nga ambientet ku po mbahej Asambleja e Partisë Republikane.
“Ne jemi për drejtësinë e pavarur me të vetmin kusht zbatimin e plotë të rekomandimit numër 88 si rruga që ofron drejtësi të pavarur dhe të pakapur nga maxhoranca aktuale. Nuk kërkojmë asgjë më shumë se zbatimi i plotë i rekomandimit të Venecias. Nuk pranojmë asgjë më pak dhe asnjë gjyqtar mbi Komisionin e Venecias”, tha Basha.
Basha shprehu bindjen për ngritjen e një sistemi zgjedhor, sipas tij, që garanton zgjedhje të lira dhe të ndershme.
“Pyetja është a do ta firmosim sot, apo do të në duhet që t’i bëjmë thirrje sovranit për të larguar këtë qeveri dhe për të shkuar drejt një qeverie teknike, e cila së paku nuk do të prekë zgjedhjet”, tha Basha. /tesheshi.com/
