Anëtari i ri i kryesisë së PD-së, Jamambër Malltezi, i njohur dhe si dhëndër i Berishës, ka denoncuar atë që e konsideroi vendim të kryeministrit Rama për kërkime nafte në zonën e Zagorisë.
“‘Nuk bën vaki që qeveria të lejojë shpime naftëkërkuese në një Park Kombëtar’- ishte deklarata e Edi Ramës për të frenuar protestat e banorëve. Në të vërtetë, ky është një mashtrim flagrant. Në 20 shkurt 2018, të gjitha mediat raportuan për arritjen e një marrëveshje historike që do të na bëntë si Arabia Saudite me shpimin në bllokun 4, zona mes Gjirokastrës dhe Sarandës. I ftoj mediat, t’u kthehen atyre pamjeve dhe t’u tregojnë shqiptarëve vakinë e paralajmëruar nga Edi Rama dhe Damian Gjiknuri”, tha Malltezi.
Sipas tij, duhet protestuar ashtu siç në Holtë.
“Shqiptarët po tregojnë gjatë gjithë këtyre ditëve se duke protestuar, mund të ndalojmë të keqen. Kështu ndodhi në kanionin e Holtës. Ne protestuam bashkë me banorët dhe qeveria u detyrua të ulej në bisedime. Protesta e përditshme ka shpëtuar shtëpitë e mijëra banorëve tek Zona e Astirit, protesta e studentëve tregon se ata akoma nuk janë dorëzuar, protesta e pritshme e pedagogëve është një sinjal po ashtu frymëzues”, theksoi zyrtari demokrat. /tesheshi.com/
