Partia Republikane i kërkon Partisë Demokratike që të miratojë 13 kandidatë të kësaj partie për krerë bashkish. Në krye të kësaj liste qëndron Agron Duka për bashkinë e Durrësit, kurse bashkitë e tjera janë të nivelit të dytë.
Nënkryetari i PR-së, Arjan Madhi deklaroi se sapo kanë nisur diskutimet dhe kërkojmë transparencë dhe vullnet nga ana e PD-së. Ndërkaq, Partia e të Drejtave të Mohura, e cila ka qenë në koalicion me PD-në në vitin 2013 shpalli largimin nga aleanca e djathtë.
Kryetari i Partisë së të Drejtave të Mohuara, Ilir Vata, nuk mori pjesë në takimin e 1 prillit me aleatët, si dhe nuk pranoi të takojë sot të dy të deleguarit e Partisë Demokratike, Edmond Spaho dhe Eduart Halimi. Kryetari i PDM-së, Vata, u shpreh se “Largohem zyrtarisht nga koalicioni, pasi për dy vite radhazi Partia Demokratike jo vetëm nuk e ka ftuar PDM, partinë e të përndjekurve politike, por ka shfaqur indiferencë të thellë në çeshtjen e të përndjekurve”.
Nën kryetari i demokratëve Edmond Spaho dhe deputeti Eduard Halimi kanë nisur takimet me përfaqësuesit e partive të koalicionit ku do të dëgjojnë pretendimet e aleatëve dhe ku do të vendoset se ku do mund të jenë pikat e bashkëpunimit për këto zgjedhje.
(tesheshi.com)
