PD është vetëdeklaruar si parti e paqes, duke përçuar mesazhin se protesta e radhës do jetë vetëm paqësore. Në betejë me faktorin ndërkombëtar që s’pajtohet me aksionin e saj të ngarkuar edhe me elementë dhune, PD deklaron se gjithçka po e bën nga vizioni i saj perëndimor.
“I sigurojmë qytetarët se Partia Demokratike është e angazhuar vetëm për protestë paqësore. Partia Demokratike është parti e lirisë dhe e vlerave europiane dhe euroatlantike, ajo ka refuzuar dhe refuzon dhunën dhe bashkëpunimin me krimin për të ardhur në pushtet.
Partia Demokratike është e vendosur: asnjë hap pas për të drejtën themelore të njerëzve të lirë, votën e lirë, të pandikuar nga krimi dhe korrupsioni, njësoj siç ndodh në Shtetet e Bashkuara të Amerikës, në Britani, Francë, Gjermani, Itali dhe kudo. Protestat tona i shërbejnë vetëm këtij qëllimi”, u tha në një deklaratë të Sekretarit të Përgjithshëm Gazmend Bardhi.
Reagimi i tij erdhi pasi Policia e Shtetit tha se kishte informacione për ushtrim dhune, gjë të cilën PD e lexoi kësijoj:
“Ripërsërisim sot apelin tonë drejtuar qytetarëve, që pavarësisht provokimit kriminal të drejtuesve të Policisë së Shtetit, që do të kenë fatin e njëjtë me atë të Edi Ramës, duhet të mbrojnë punonjësit e thjeshtë të policisë, të cilët kanë të njëjtat halle dhe probleme me secilin prej qytetarëve që dalin në protestë”, u tha në deklaratën e PD-së. /tesheshi.com/
