Partia Demokratike ka ndërmarrë sot një ofensivë të vërtetë ndaj qeverisë për çështjen e sipërfaqësve të mëdha të mbjella me kanabis në vend.
Dy drejtues të opozitës kanë dalë në dy konferenca shtypi të njëpasnjëshme për të denoncuar fakte apo argument që sipas tyre tregojnë lidhjen e qeverisë me klanet e trafikantëve të hashashit.
Sekretarit për Aksionin Qytetar në PD, Ervin Salianji, ka akuzuar qeverinë se po mbron trafikantët të cilët kanë ekzekutuar dëshmitarët për faktet mbi fushat me hashash.
“Elidjan Pashaj nga Mallakastra u vra në Këlcyrë nga një trafikant që kishte zaptuar tokat atje dhe i kishte mbjellë me kanabis. Altin Llani nga Fieri u vra në Tepelenë, pikërisht për tokat e mbjella me kanabis. Shumë përplasje e sulme me armë që po ndodhin pothuajse çdo ditë në vend, në fshatra e qytete, kanë si motiv pikërisht zonat e influencës dhe pazaret e drogës”, ka vijuar eksponenti i PD.
Kurse, kreu i Departamentit të Rendit dhe Sigurisë në PD, Enkeleid Alibeaj ka shkuar edhe më tej, ai ka akuzuar se është emëruar si kreu i trafiqeve, një trafikant i dënuar për implikim me drogën.
“Ka caktuar në Policinë e Korçës, në cilësinë e shefit të seksionit të trafiqeve një person të dënuar pak muaj më parë nga Gjykata e Krimeve të Rënda, saktësisht më 13 prill të këtij viti, pikërisht për bashkëpunim me trafikantët e drogës. Nardi Neli është dënuar nga Gjykata e shkallës së Parë e Krimeve të Rënda e cila ka kërkuar që ky oficer të mos ushtrojë veprimtari publike për 3 vjet”, ka deklaruar Alibeaj.
/tesheshi.com/
