Partia Demokratike po joshet nga modeli rumun i protestave anti-korrupsion, për t’i aplikuar ato në kushte shqiptare; ndonëse atje nuk është opozita politike që ka dalë në rrugë, por njerëzit e thjeshtë me vullnet e tyre jashtë politikës.
Kreu i PD-së, Lulzim Basha duke u folur një grupi të rinjsh në Tiranë, përmendi para tyre pikërisht atë që po ndodh në Rumani këto ditë.
“Ku ngrihen qytetarët, ku ngrihet rinia nuk ka qeveri të korruptuar e të inkriminuar t’ju bëjë ballë. E pamë në Rumani, tani është radha e shqiptarëve të ngrihen kundër papunësisë, kundër shëndetësisë së kolapsuar, kundër arsimit në ditën më të zezë, kundër diskriminimit të rinisë që i është lënë emigracioni si rruga e vetme”, ka thënë Basha.
Siç dihet PD ka paralajmëruar rinisjen e protestave në rrugë me datë 18 shkurt, ku siç po bën thirrje i gjithë lidershipi i PD-së të gjithë duhet të ngrihen kundër pushtetit.
“Ndaj, më 18 shkurt të ngrihemi të gjithë bashkë për të marrë fatet në dorë, për të diktuar me pushtetin e qytetarëve zgjedhjet e lira dhe të ndershme dhe përmes tyre për të diktuar që pushteti t’iu kthehet një herë e mirë qytetarëve”, ka theksuar kreu demokrat. /tesheshi.com/
