Një vendim i një viti më parë i kreut demokrat Lulzim Basha për të ngrirë funksionet e kryetarit të degës së PD-së në Durrës, duket se ka lënë pa drejtues një nga strukturat më të mëdha të kësaj partie.
Osman Stafa u zgjodh me parimin një anëtar një votë, ashtu si drejtues të tjerë të degëve të PD-së, por pas humbjes së zgjedhjeve vendore të 2015-ës, ai u ngri nga funksionet.
Prej nga ky moment, PD e Durrësit drejtohet nga Oerd Bylykbashi, i komanduar në këtë degë, por duket se strukturat nuk funksionojnë.
Ngrirja e Stafës zgjati përtej çdo parashikimi, ndërkohë që Basha për humbjen e pësuar në 25 qershor, ngriu funksionet jo për më shumë se 3 javë.
Dhe kjo u pa edhe në zgjedhjet parlamentare të 25 qershorit, ku PD morri një rezultat edhe më të dobët se ai i dy viteve më parë për bashkinë e qytetit.
Stafa thotë se është kryetari legjitim i kësaj dege dhe se ndaj tij është shkelur statuti i PD. Në këto kushte, sipas Stafës Durrësi është pa opozitë e për pasojë qytetarët ndjehen të pa mbrojtur nga abuzimet e qeverisë.
Kreu i ngrirë i Durrësit bën fajtor strukturat drejtuese të PD për këtë situatë. Ndërkohë që nga qendra duket se zgjidhja që do të gjendet është organizimi i zgjedhjeve të reja, pas analizës për 25 qershorin.
Por deri atëherë, dega e dytë më e madhe e PD-së në vend, ka mbi 1 vit pa kryetar dhe pa struktura të tjera, të cilat janë shpërbërë, janë ngrirë apo janë shkarkuar. /tesheshi.com/
