Sipas Partia Demokratike, kapja e një sasie prej tonaletash droge në një punishte në Rrëshen, ka çuar në ndëshkimin e qeverisë ndaj oficerëve të policisë që bën të mundur zbulimin e punishtes. Enkelejd Alibeaj, kreu i Departamentit të Rendit dhe Sigurisë në këtë parti, e tha këtë në një dalje për shtyp.
“Me Edi Ramën, trafikantët dhe baronët e drogës kanë mbrojtje deri në fund. Ngjarje tronditëse, që dëshmojnë rreshtimin e Ramës në krah të biznesit të kanabisit kanë ndodhur pas aksionit të fundit të kapjes së sasive të mëdha me hashash në Rrëshen. Të dy agjentët kryesorë të policisë që gjurmuan dhe bënë të mundur kapjen e drogës, janë ndëshkuar, janë transferuar. Ilir Sula, shefi i sektorit të krimit të organizuar dhe trafiqeve dhe Agron Qullhaj, shefi i anti-drogës në Lezhë, në vend se të shpërbleheshin e të promovoheshin në detyrë nga Edi Rama, janë degdisur në role periferike, pa asnjë motiv”, tha Alibeajm duke shtuar më tej se tashmë, në policinë e Lezhës është dërguar një njeri i Shullazit, Ermal Muça.
“Këtë rrugë ai e shtroi edhe më parë, duke dërguar në krye të Policisë së Lezhës, një ushtar të konfirmuar të Shullazit, një njeri të kontestuar publikisht, të përfshirë në ngjarje kriminale, sic është Ermal Muca”.
Kjo është e disata herë që ky i fundit akuzohet nga opozita si njeri i lidhur me Shullazin, por ashtu siç kolegë të tij të tjerë në strukturat e policisë të përfolur për lidhje me krimin dhe trafiqet, nuk ka dalë të përgënjeshtrojë asnjëhërë akuzat, edhe pse ftuar disa herë në debate televizive. /tesheshi.com/
