Partia Demokratike ka ngritur një tjetër kauzë kundër ministrit të Brendshëm, Fatmir Xhafaj.
Sipas PD-së, policia po survejon liderin e opozitës, Lulzim Basha. Ish-ministri i Brendshëm Flamur Noka dhe nënkryetari Kuvendit, Edi Paloka shkuan vetë në Drejtorinë e Përgjithshme të Policisë për të denoncuar faktin.
Ndërkaq, Drejtoria e Policisë e ka përgënjështruar lajmin e publikuar në një media në vend, duke e cilësuar të pavërtetë dhe spekulim.
Por akuzat kanë vijuar. Ishte kreu i grupit parlamentar të PD-së, Edmond Spaho që akuzoi Edi Ramën se ka urdhëruar survejimin e Bashës.
“Ndjekja dhe përgjimi i kryetarit të opozitës bëhet për interesa kriminale. Në këtë operacion Rama dhe Xhafaj po përdorin strukturat e policisë që janë krijuar dhe kanë për qëllim të gjurmojnë dhe luftojnë krimin dhe drogën për të gjurmuar dhe luftuar ata që që denoncojnë krimin dhe drogën.
Ky operacion dëshmon se qeveria funksion si një pushtet privat kriminal në mbrojtje të trafikut të drogës dhe krimit të organizuar ku janë përfshirë drejtuesit më të lartë të qeverisë.
Këto operacione klandestine kriminale kanë garancinë e mbrojtjes nga prokurorja politike e drejtuar nga Arta Marku, përfaqësuesja dhe shërbëtorja politike e dyshes Rama-Xhafaj. Këto veprime kriminale kanë garancinë e mosndëshkimit si rezultat i shkatërrimit të Gjykatës Kushtetuese, paralizimit të plotë të Gjykatës së Lartë dhe kontrollit të plotë mbi sistemin e drejtësisë nga Edi Rama dhe Fatmir Xhafaj”, tha Spaho./tesheshi.com/
