Më anë të Sekretarit të Përgjithshëm Gazmend Bardhi, PD iu është përgjigjur ndërkombëtarëe duke mohuar që ajo të nxisë dhunën.
Sipas demokratëve madje, është Rama ai që po kundërvë PD-në me ndërkombëtarët. Ndërsa për rastin e ambasadorit të OSBE mohohet autorësia e mbishkrimeve në banesën e tij.
“I sigurojmë qytetarët se Partia Demokratike është e angazhuar vetëm për protestë paqësore. Partia Demokratike është parti e lirisë dhe e vlerave europiane dhe euroatlantike, ajo ka refuzuar dhe refuzon dhunën dhe bashkëpunimin me krimin për të ardhur në pushtet.
Është e dënueshme çdo përpjekje propagandistike e qeverisë për ta kundërvënë Partinë Demokratike me partnerët tanë, si në rastin e mbishkrimeve në banesën e ambasadorit të OSBE-së. Ne i kërkojmë prokurorisë të zbulojë kush janë autorët e këtij akti të shëmtuar dhe t’i vërë ata përpara përgjegjësisë”, u tha në deklaratë.
Më tej, PD këmbëngul se do e vazhdojë betejën e saj, duke iu kujtuar të gjithë zërave ndërkombëtarë që janë pozicionuar kundër saj, se ajo nuk dëshiron veçse të ndiqet shembulli i tyre.
“Partia Demokratike është e vendosur të mos bëjë asnjë hap prapa për të drejtën themelore politike të njerëzve të lirë, votën e lirë, të pandikuar nga krimi dhe korrupsioni, njësoj siç ndodh në Shtetet e Bashkuara të Amerikës, në Britani, Francë, Gjermani, Itali dhe kudo.
Protestat tona i shërbejnë vetëm këtij qëllimi. Ne jemi distancuar nga dhuna dhe e kemi dënuar atë që gjatë protestës së 11 Majit. Mediat kanë transmetuar live thirrjen e Kryetarit të Partisë Demokratike Lulzim Basha për protestuesit, që të mos cënojnë asnjë polic në krye të detyrës”, u tha në deklaratë. /tesheshi.com/
