Albana Vokshi, deputetja që i është kushtuar dosjes së pretenduar të korrupsionit në shëndetësi, ku në qendër janë konçensionet e qeverisë, ka denoncuar sërish, edhe “me laps në dorë”, atë që e ka konsideruar dështimin më të madh të praktikave konçensionare, check up-in.
“Check up-i është më i dështuari, sepse vetëm 26 përqind e shqiptarëve që e përfitojnë, e kanë kryer këtë shërbim pavarësisht kushtëzimit të ndihmës ekonomike dhe vizitat e të sëmurëve kronikë. Check up-i është më korruptivi, sepse vetëm për dy vitet e para të konçesionit të check up-it, pa përfshirë 2017-ën, klientja e Edi Ramës, Vilma Nushi, ka marrë nga buxheti i shtetit rreth 4 milionë euro për rreth 250 mijë analiza të pabëra asnjëherë. 1,7 milionë euro në 2015-ën dhe 2.3 milionë euro në 2016-ën, siç tregohet edhe në tabelën e Fondit të Kujdesit Shëndetësor. 4 milionë euro për një shërbim të padhënë, është provë se check up-i jo vetëm nuk është falas, siç thotë Edi Rama, por me këtë konçesion, kontrolli shëndetësor është kthyer në një shërbim disa herë më i shtrenjtë. Ky përfitim marramendës është parashikuar në kontratën e Edi Ramës me klienten e tij Vilma Nushi, e cila do të vazhdojë të paguhet 7 milionë euro në vit, edhe sikur check up-in ta kryejë një shqiptar i vetëm. Kjo është arsyeja pse Edi Rama prej dy vjetësh refuzon ta bëjë publike këtë kontratë zhvatëse për shqiptarët, si dhe çdo kontratë tjetër konçesionare në shëndetësi”, tha deputetja Vokshi.
Sipas saj, kjo është një ndër aferat që ndodhet në Prokurori prej një viti, e që duhet hetuar nëse do ketë vërtet reformë në drejtësi. /tesheshi.com/
