Partia Demokratike ka kundërshtuar Policinë e Shtetit në paralajmërimet e saj mbi elementë të mundshëm destabilizues në protestën e 16 shkurtit. Ajo ka reaguar me gjuhë politike ndaj paralajmërimit policor, duke e parë destabilitetin te qeveria.
“Në Shqipëri ka vetëm një skenar destabilizimi. Ai është skenari i Edi Ramës për të qeverisur bashkë me krimin e organizuar, i cili blen vota dhe mandate për të mbajtur në pushtet Edi Ramën.
Edi Rama ka vetëm një detyrë: t’i hapë rrugë zgjidhjes politike! Ai nuk mund të qeverisë më me mandate të vjedhura dhe kundër interesit të shqiptarëve! Koha për Edi Ramën është drejt skadimit!
I bëjmë thirrje të heqë dorë nga çdo skenar destabilizues që ka mbi tryezën e tij! Në të kundërt, Edi Rama do të jetë i vetmi që do të mbajë përgjegjësi, njësoj si çdo diktator që del kundër vullnetit të popullit të bashkuar!
Ftojmë shqiptarët të injorojnë kërcënimet e një pushteti të kalbur nga krimi dhe korrupsioni! Shumica dërrmuese e policëve janë me protestuesit, sepse ata duan që të luftohet krimi. Njësoj si ne të gjithë, edhe policët duan më shumë siguri për fëmijët e tyre, më shumë mundësi për ta dhe duan t’i rrisin ata në një vend normal.
Më 16 shkurt, së bashku do t’i hapim rrugë normalitetit europian në Shqipëri!”, u tha në një deklaratë të PD-së, me gjuhën e Gazmend Bardhit. /tesheshi.com/
