Partia Demokratike këmbëngul në hetimin e deklaratës së ministrit të Brendshëm, Saimir Tahiri, i cili tha se e kishte shitur makinën për të cilën akuzohej se kishte bërë trafik droge. Enkelejd Alibeaj në një dalje të re për mediat deklaroi se 1 vit nga “shitja” e makinës, Tahiri është shfaqur në timonin e saj në pikën kufitare të Kapshticës.
“Ndërsa më herët, më 16 gusht, Tahiri dhe “AA 003 GB” shfaqen në pikën kufitare të Qafë Botës”, saktësoi Alibeaj, duke iu referuar dokumenteve të sistemit TIMS.
“Këto janë faktet. Tahiri nuk e ka shitur makinën, ajo është pronë e tij dhe përdoret për trafikun e drogës. Ky mashtrim publik vërteton edhe njëherë përfshirjen e Tahirit në trafikun e drogës, madje drejtimin e tij, sepse garancia e Tahirit është imunitet për trafikantët”, deklaroi Alibeaj.
Prokuroria, sipas Alibeajt, duhet të kishte nisur menjëherë marrjen nën përgjegjësi penale të ministrit të Brendshëm.
“Tahiri duhet të largohet menjëherë nga detyra dhe duhet të hetohet deri në fund”, përfundoi ai, ndërkohë që kanë qenë të përditshme akuzat e partisë Demokratike për ministrin e Brendshëm, Tahiri për lidhje të këtij të fundit me narkotrafikun.
Vetë Tahiri i konsideron akuzat si reagim ndaj sukseseve të arritura prej tij në luftën kundër drogës, ndërsa kryeministri Rama më herët shkoi më tej duke i cilësuar akuzat, reagim për prishjen e pazareve. /tesheshi.com/
