Në një protestë të shoqërisë civile organizuar para kryeministrisë për rastin “Xhisiela”, fjalën e ka marrë dhe zëdhënësja e PD-së, Ina Zhupa. Në fjalën e saj, ajo ka bërë thirrje që vajzës së dhunuar nga Rexhep Rraja, djali i deputetit socialist Rrahman Rraja, t’i ofrohet mbrojtje nga BE.
“Unë nuk mund t’i bëj thirrje për mbrojtje këtij shteti. Po unë kam një thirrje për mbrojtje ndaj një ambasadori që i besoj shumë, ambasadorit të BE-së, zotit Luigi Soreca. I bëj thirrje që të sigurojë në një nga vendet anëtarë të BE-së mbrojtje dhe siguri fizike, morale dhe psikologjike për Xhisielën, motrën dhe nënën e saj. Nesër këtë kërkesë do ta bëj zyrtare”, theksoi znj.Zhupa.
Ky është rast i rrallë kur një parti politike – nëse zëdhënësja Zhupa ka folur nën siglën e PD-së – kërkon azil për një shtetase.
Ai që pret azilin deri më tani, duke përfituar nga çfarë i ka ndodhur Xhisiela Malokut me efektet zinxhir, është ish-oficeri i policisë Emiljano Nuhu, njeriu i ngarkuar për të proceduar pas denoncimit të vajzës, por që dezertoi duke pretenduar se po kërcënohej. /tesheshi.com/
