Ka reaguar selia blu ndaj një shënimi të kryeministrit Rama, ku në një frazë të tij, i vëllai i Fatmir Xhafës, Agron Xhafa, konsiderohej “një njeri në punë të vet”, pra aspak i përfshirë në ndonjë trafik ndërkombëtar droge, e aq më pak i kërkuar nga autoritete venezueliane, siç u tha pak ditë më parë nga PD. Por sot, Grida Duma, doli sërish në një konferencë për shtyp për të mbrojtur versionin e partisë së saj.
“Edi Rama mori në mbrojte Agron Xhafajn, një trafikant ndërkombëtar droge, të provuar për aktivitetin e tij nga drejtësia e Venezuelës, madje nga Gjykata e Lartë e saj vendimin e të cilës ka cituar dhe shpërndarë dje Partia Demokratike”, tha znj. Duma.
“Në këtë vendim, që përshkruan aktivitetin e Agron Xhafajt, në shpërndarjen e drogës në Itali, e në vecanti në zonën e Bolonjas, Gjykata e Lartë e Venezuelës thotë se është provuar roli i tij në këtë bandë ndërkombëtare të trafikut të drogës. Por Edi Rama, sulmon me tërbim Gjykatën e Lartë të Venezuelës, sulmon drejtësinë italiane, sulmon opozitën dhe merr në mbrojtje narkotrafikantin ndërkombëtar, Agron Xhafa, vëllai i Fatmir Xhafës. Pse duhet që vëllai i një trafikanti ndërkombëtar droge, me kërkesë ekstradimi për të nga Venezuela të caktohet nga Edi Rama kryetar i reformës në drejtësi?, është pyetja që bën çdo qytetar. “Ku është problemi këtu”, thotë Edi Rama. Nuk është hera e parë që Edi Rama merr në mbrojtje trafikantët dhe krimet e tyre”, tha sekretarja e marrëdhënieve me publikun në PD.
Ndërkohë, as Fatmir Xhafa e as vëllai i tij, nuk kanë reaguar ndaj kësaj akuze. /tesheshi.com/
