Partia Demokratike depozitoi sot në Prokurorinë e Tiranës kallëzimin penal për drejtorin e policisë bashkiake të Tiranës dhe drejtorin e Policisë së Tiranës, për dhunën e ushtruar dje në protestën për mbrojtjen e Parkut të Liqenit.
Partia Demokratike e konsideron të paligjshme dhunën brutale të ushtruar dje me urdhër politik ndaj protestuesve dhe mbështetësve të PD, dhe kërkon vendosjen e drejtësisë.
“Ajo që unë dua të përcjell dhe një herë është se dhuna nuk të çon askund, dhuna nuk ka çuar askund edhe burra më të mirë dhe në shtete të tjera në botës, përkundrazi i ka njollosur me damkën e antikombëtarizmit dhe antivlerave”, – tha Arben Ristani.
Ai e cilësoi ndalimin dhe arrestimin e protestuesve të PD si në kundërshtim me ligjin. Sipas tij, policia bashkiake nuk është e detyruar nga ligji dhe nuk ka tagrin ligjor të merret me tubimet që zhvillohen.
“Përsa i përket deputetit Strazimiri unë jua thash dhe herë tjetër, është një lojë që zhvillohet për të të tërhequr vëmendjen nga gjërat kryesore, nga beteja kryesore që ne kemi me paligjshmërinë që ka kapur këtë klasë politike në mazhorancë, e cila ka mbushur jo vetëm parlamentin me kriminelë jo vetëm administratën publike me kriminelë, por deputetët e tyre vrasin publikisht qëllojnë me armë duke lënduar njerëz të pafajshëm. Pra e gjithë kjo bëhet për të shpërqendruar vëmendjen. Ai nuk ka pasur armë dhe nuk kishte pse të kishte armë”, – u shpreh ndër të tjera Ristani. /tesheshi.com/
