Ka tërhequr vëmendjen fakti se Partia Demokratike për dy ditë rresht ka sulmuar fort, përkatësisht nga Grida Guma, një marrëveshje të firmosur mes qeverisë shqiptare dhe një korporate të madhe turke, Süzer Group, për ndërtimin e një hidrocentrali të madh në Dibër, mbi lumin Drin.
“Skavica”, tha Duma, “është ndoshta projekti më korruptiv dhe pazari më i dyshimtë i Edi Ramës me pasuritë publike.”
“A ka bërë ai negociata të fshehta e të paligjshme me kompaninë Süzer? Pse u mbajt sekret propozimi i Süzer-it dhe vlerësimi me bonus? Pse vendimi i qeverisë për Süzer-in nuk u publikua bashkë me vendimet e tjera të datës 23 dhjetor, por vetëm pasi denoncoi opozita? Sa herë e ka vizituar Turqinë në dy vitet e fundit ministri Ahmetaj, dhe me ç’qëllime? Edi Rama refuzon të përgjigjet, por ai do të marrë përgjigjen e merituar nga qytetarët për aferat e tij korruptive me pasuritë publike,” deklaroi Guma sot.
Bëhet fjalë për një projekt që kap shifrën e 110 milionë eurove, dhe që tashmë ka nisur. Süzer Group ka firmosur në vitin 2014 një investim të përbashkët me Nurol Group-in për ndërtimin e hidrocentralit me fuqi 57 MW në Katund të Ri. Projekti qe në plan të niste në fund të vitit të shkuar, por është vonuar, e do të nisë këtë vit. Dhe, sipas planifikimit, do të përfundojë brenda 30 muajve.
Ndërtimi i këtij hidrocentrali, që, në fakt, është një Skavicë e vogël, pritet që të sjellë një shtim të ujërave për Fierzën, në mënyrë që ky hidrocentral të mos mbetet në pjesën më të madhe të vitit pa prodhuar energji, duke krijuar probleme për kapacitetin e saj. Specialistët thonë se uji nga Skavica do ta kthejë Shqipërinë në një fuqi reale të energjisë së prodhuar bio.
Ndërkaq, Grida Guma deklaroi se kjo marrëveshje nuk është bërë transparente, ndërsa media pranë PD-së kanë akuzuar Shpëtim Idrizin, i cili ka ndërhyrë për këtë projekt, pasi një prej menaxherëve të saj ka miqësi me kreun e PDIU-së.
Por të bie në sy sulmi i dytë nga e djathta shqiptare, posaçërisht nga Partia Demokratike, ndaj kompanive turke që marrin pjesë në investime strategjike në Shqipëri. E njëjta gjë ndodhi edhe në vitin 2004 kundër Çalık Group-it, të cilit qeveria e Fatos Nanos i shiti Albtelekomin dhe frekuencën e tretë të telefonisë celulare. Berisha sapo erdhi në pushtet e anuloi kontratën, dhe turqit hynë në treg me dy vite vonesë.
E njëjta gjë ndodh edhe tani. Süzer Group është ngritur në vitin 1952, me qendër në Gaziantep, një qytet turk pranë Mesdheut, në fillim si kompani lokale që merrej me tregti dhe me ndërtim. Ndërsa sot është një korporatë që zotëron kombinatin e madh ushqimor Kent, si dhe hotelin luksoz “Ritz Carlton” në Stamboll. Ajo është një prej kompanive të pakta turke që kanë një bilanc më të madh se një miliard dollarë amerikanë. Në të njëjtën kohë, Süzer Group është në sektorin e energjisë një nga aksionerët më të mëdhenj të kompanisë së shpërndarjes së gazit të Bahçeshehirit, që përbën kompaninë e parë turke që importon gaz natyror nga burimi. /tesheshi.com/
