Partia demokratike ka denoncuar mënyrën se si punësohen njerëzit në administratën e sotme drejtuar nga socialistët. Nga selia blu, Enkelejd Alibeaj publikoi një dokument, që sipas tij tregon se Edi Rama nuk po bën shtet, por po ndërton një administratë nepotike dhe të korruptuar.
“Ja çfarë ndodh në Drejtorinë e Burgjeve. Dokumenti konfidencial, që qëndron në tavolinën e drejtorit si kujtesë për të, tregon të punësuarit dhe në krah të tyre, sekserin. Në 6 raste, sekseri është Saimir Tahiri; në 11 raste sekseri është Fatmir Xhafaj; në 6 raste sekseri është ministrja kushërirë, Milena Harito; në 5 raste sekseri është Ditmir Bushati; në 4 raste sekserja është Lindita Nikolla; në 6 raste sekseri është Rakip Suli; në 4 raste sekseri është Sadri Abazi; në 7 raste sekserja është Vasilika Hysi; në 6 raste sekseri është Besnik Bare; në 7 raste sekseri është Pandeli Majko.
Pas publikimit të këtij dokumenti, Alibeaj tha se “ky pra është shteti i Edi Ramës. Një shtet i korruptuar, tribal, që funksionon me lidhje nepotike e me rekrutime me para’ në dorë. Skandale si këto e një qeverie të zhytur në korrupsion e krim e kanë ngritur popullin në këmbë”.
/tesheshi.com/
