Merr formë politike kontestimi ndaj bashkisë së Tiranës, e cila ka shpallur ndërtimin e një parku lojrash për fëmijë në Parkun e Liqenit Artificial.
Ndërsa një ditë më parë ishin një grup që e quanin veten ambjentalistë, të cilët protestuan dhe u përplasën me policinë, sot ka qenë Partia Demokratike që ka bërë një protest para bashkisë së Tiranës dhe më pas ka hyrë në ambjentet e zonës ku do të ndërtohet këndi i lojrave dhe kanë prishur sërish skelat e drurit.
PD-ja inicoi një protestë, në të cilën u qëlia me vezë e domate ndaj ndërtesës së qeverisjes vendore të kryeqytetit.
Kryetari i Këshilltarëve demokratë Leonard Olli deklaroi se “Protesta ka për qëllim ti thotë jo arbitraritetit, antishtetit antiligjit po veprohet në formën e një bande. Do të ndalim jo vetëm ndërtimin tek liqeni një ndërtim korruptiv por dhe të paligjshëm”.
Ndërkohë, në tubimin e zhvilluar tek ligjeni ka pasur sërish incidente mes policisë dhe protestuesve në parkun e Liqenit.
Ndërkaq, Kreu i bashkisë së Tiranës, Erion Veliaj ka deklaruar se nuk tërhiqet nga projekti. Në një intervistë për Top Channel nga Londra Veliaj tha: “Nëse do të tërhiqesha do ishte në rrezik i gjithë transformimi i Tiranës, sepse do të tregonte që jemi kthyer në kohën e komunizmit ku shijet arkitekturore u vendosën nga partia dhe jo ekspertët. Ne kemi patur disa ekspertë, nga një kompani gjermane, e cila është nga më të mirat për arkitekturën. Arkitektët kanë menduar se ai është vendi ideal, duke qenë se ka hije dhe se është në hyrje të parkut, dhe se prindërit janë afër për të ndjekur aktivitetin e fëmijëve. Do të jetë një park shumë i ngjashëm me parqet që kemi parë edhe këtu në Londër”.
/tesheshi.com/
